Qurlyq áskerleri bas qolbasshylyǵynyń komandasy atys boıynsha chempıonattan úzdik shyqty

ASTANA. QazAqparat - QR Qorǵanys mınıstrligi ortalyq apparatynyń, Bas shtabynyń, QR Qarýly Kúshter túrleriniń bas qolbasshylary basqarmalarynyń, «Jas ulan» mektebiniń jáne Aqmola garnızonyna qarasty áskerı bólimderdiń qurylymdyq bólimsheleri arasynda tabeldi qarýdan atys boıynsha chempıonat ótti.

Bul týraly QR QM baspasóz qyzmeti habarlaıdy.

Áskerı qyzmetshiler AK-1 jáne PM-1 qarýyn atýdan synaqtar tapsyrdy. AK-1 jattyǵýy - bul dóńgelek nysandy 100 metr qashyqtyqtan AK-74 qarýynan dáldep atý. PM-1 jattyǵýy - bul PM pıstoletinen dóńgelek nysandy 25 metr qashyqtyqta turyp kózdep atý bolyp tabylady.

AK-1 boıynsha jeke synaqta birinshi oryndy podpolkovnık D. Sádýaqasov jeńip alsa, áskerı qyzmetshi qyz-kelinshekter arasynda PM-1 qarýynan synaqta ekinshi oryndy aǵa leıtenant A. Muhtarova ıelendi. Eki áskerı qyzmetshi de QR QK Qurlyq áskerleri Bas basqarmasy jaýyngerlik daıarlyq basqarmasynyń ofıtserleri.

Eki jattyǵý boıynsha toptar arasyndaǵy oryndar tómendegideı bolyp bólindi: 1-oryndy QR QK Qurlyq áskerleri bas qolbasshysynyń basqarmasy jeńip alsa, 2-oryndy QR QM Tyl bastyǵynyń basqarmasy jáne 3-oryndy 14776 áskerı bólimi ıelendi. Atalǵan chempıonatqa barlyǵy 29 top qatysqanyn atap ótken jón.