Qurlyq áskerleri áskerı ınstıtýtynda túlekterdi shyǵaryp salý rásimi ótti - Almaty

ASTANA. 29 maýsym. QazAqparat - Búgin Almatyda Qurlyq áskerleriniń áskerı ınstıtýtynda oqý bitirgen túlekterdi shyǵaryp salý saltanatty rásimi ótti,

dep habarlady Qorǵanys mınıstrliginiń baspasóz qyzmetinen.

Oǵan bir kezderi osy áskerı oqý ornynan qanat qaqqan - Qazaqstan Qarýly Kúshteri Bas shtabynyń bastyǵy general-polkovnık Sáken Jasuzaqov, Uly Otan soǵysynyń jáne Qarýly Kúshterdiń ardagerleri, kýrsanttardyń ata-analary men týǵan-týystary qatysty.

Bıyl Áskerı ınstıtýt óz qabyrǵasynan 400-den astam leıtenanttardy shyǵaryp salmaq. Áskerı salanyń on bir mamandyǵy boıynsha arnaıy bilim alǵan jas ofıtserler oqý ornynyń keń platsynda saltanatty sap túzep, kóterińki kóńil-kúı jaǵdaıynda dıplom alý rásimin jasady.

Qarýly Kúshterge úzdik dıplommen bitirgen 22 leıtenant attanbaq. Instıtýttyń Qurmet taqtasyna «Áskerı oqý ornyn úzdik bitirgeni úshin» tósbelgisimen jáne úzdik dıplom alǵan kýrsanttar Ilıas Mýhamadıev pen Marat Saparǵalıevterdiń esimi jazyldy.

Instıtýt tarıhy KSRO Joǵary Keńesiniń qaýlysy negizinde 1970 jyly qurylǵan Almaty joǵary jalpy áskerı komandalyq ýchılışesinen bastalady.

Qazaqstan Respýblıkasy Prezıdentiniń 1997 jyldyń 11 aqpany № 3353 Jarlyǵymen I.S.Konev atyndaǵy Almaty joǵary jalpy áskerı komandalyq ýchılışesi Qazaqstan Respýblıkasy Qarýly Kúshteriniń Áskerı akademııasyna aınaldy.

2003 jyldyń 31 qazanynda Qazaqstan Respýblıkasy Úkimetiniń № 1080 qaýlysymen QR QK Almaty joǵary áskerı ýchılışesi Qurlyq áskerleriniń Áskerı ınstıtýty bolyp aty ózgertildi.

Ujymdyq qaýipsizdik sharty uıymy Qorǵanys Mınıstrleri Keńesiniń 2005 jyldyń 30 qarashasy sheshimine sáıkes Qurlyq áskerleriniń Áskerı ınstıtýty Ujymdyq qaýipsizdik kelisimi uıymyna múshe-memleketterdiń Qarýly Kúshterine áskerı kadrlardy birigip daıyndaıtyn oqý oryndardyń tizimine qosylǵan. Bıyl Qyrǵyz Respýblıkasynan - 9, Tájikstan Respýblıkasynan 15 kýrsant dıplom alyp, elderine attandy.