Qurlyq áskerleri arasynda ótken bokstyń jeńimpazdary anyqtaldy (FOTO)

ASTANA. QazAqparat - Búgin Astanada QR Qorǵanys kúshteri Qurlyq áskerleriniń arasynda ótken bokstan alǵashqy ashyq chempıonat aıaqtaldy. Elorda tórinde tórt kún boıy segiz salmaq dárejesinde 68 boksshy chempıondyq ataqqa kim laıyqty ekenin ózara sarapqa saldy. Bul týraly QR Qorǵanys mınıstriliginiń baspasóz qyzmetinen habarlaıdy.

El birinshiliginde «Astana», «Batys», «Shyǵys», «Ońtústik» óńirlik qolbasshylyqtarynan, sondaı-aq áskerı quramalar men bólimderden 10 komanda qatysty.

Óz salmaq dárejesinde áskerı qyzmetshiler Jandos Janpeıis (56 kg), Talǵat Oraqbaev (60 kg), Almas Isaev (64 kg), Erkebulan Egeýbaev (69 kg), Abzal Orynbaev (75 kg), Rýslan Shaıhýlın (81 kg), Rýslan Dadahanov (91 kg) jáne Nıkolaı Beskorovaınyı (+ 91 kg) chempıondyq ataqqa qol jetkizdi.

Al, komandalyq esepte júldeli birinshi oryndy aeroutqyr áskerleriniń boksshylary ıelense, ekinshi oryndy Otardaǵy 40-shy áskerı bazasynyń bylǵary qolǵap sheberleri enshiledi. «Ońtústik» óńirlik qolbasshylyǵynyń komandasy úshinshi orynǵa taban tiredi.

Týrnırge qurmetti qonaq retinde qatysqan Afına Olımpıadasynyń chempıony, Barker kýbogynyń ıegeri Baqtııar Artaev áskerı qyzmetshilerdiń daıyndyǵyna joǵary baǵa berdi. Sondaı-aq Sport komıtetiniń tóraǵasy, QR QM Armııa ortalyq sport klýbynyń bastyǵy polkovnık Erlan Talasbaev kelesi jyldan bastap bul chempıonattyń búkil Qarýly Kúshter deńgeıinde ótýin qarastyrýda ekendikterin jetkizdi.