Qurlyqtyq dodaǵa quramany jasaqtaǵan bapkerler eńbegi baǵalaýǵa turarlyq – Ermahan Ibraımov
ASTANA. KAZINFORM - Olımpıada chempıony, qazir Olımpıadalyq daıarlaý ortalyǵy dırektory qyzmetin atqaratyn Ermahan Ibraımov Kazinform tilshisine jaqynda aıaqtalǵan 22 jasqa deıingi jastar arasyndaǵy Azııa chempıonatyndaǵy qazaqstandyq boksshylardyń jetistigi jaıynda oı-pikirimen bólisti.
- Shrı-Lanka astanasy Kolombo qalasynda bolǵan qurlyqtyq dodada 41 altyn jeńip aldy. Qazaqstandyq boksshylardyń bul kórsetkishin qalaı baǵalaısyz?
- Árıne, bul tabysty joǵary baǵalaımyn. Onyń ishinde 19 jasqa deıingi sportshylar ózim basqaratyn Olımpıadalyq daıarlaý ortalyǵynda tálim alady. Qazir ortalyq 18 sport túrin biriktirip otyr. Al 22 jasqa deıingi boksshylar Sportty damytý dırektsııasy daıarlap, qarjylaı qoldaý kórsetedi. Dese de, keıingi ýaqytta olar olımpıadalyq daıarlaý ortalyǵynda daıyndyq júrgizdi.
Aıta ketsem, 22 jasqa deıingi quramanyń bas bapkeri Baqyt Sársekbaev ózderiniń oqý-jattyǵý jıynyna jıi shaqyryp turdy. Biz olardy qazaq boksynyń bolashaǵy dep baǵalaımyz. Qolymnan kelgenshe qoldaý kórsettim. Aqyl-keńesimdi aıttym. Batamdy berdim.
Ras, olar qurlyqtyq dodada sharshy alańda sheberligin kórsete bildi. Barlyq salmaqta bas júldege qol sozyp, ózge elderdiń mamandary tarapynan da oń baǵalandy. Aldaǵy ýaqytta sol úrdis jalǵasyn tabady degen oıdamyn. Qazaqstandyq bapkerlerdiń de eńbegi baǵalaýǵa turarlyq. Olar quramany jasaqtap alyp bardy. Shákirtterine aqyl-keńesin berdi. Nátıjesin ózderińiz bilesizder.
- Keıingi jyldary Azııa qurlyǵynda boks sporty keńinen qanat jaıyp kele jatqandyǵy baıqalady. Bul jóninde ne aıtar edińiz?
- Ony qalypty qubylys retinde qarastyramyn. Alysqa uzamaı-aq ońtústiktegi kórshimiz Ózbekstan jaıly aıtaıyq. Onda boksta zor serpilis bar. Álemdik deńgeıde aldyńǵy qatardan kórine bastady. Parıj Olımpıadasynda joǵary nátıjege qol jetkizip, rekordtyq kórsetkishti tirkedi. Bul baǵytta onda kóp jumys jasalǵanyn bilemiz. Boksqa barynsha qoldaý kórsetildi. Onda bir oqý-jattyǵý jıynyna 200-250 boksshy jınalady. Olardy bólek-bólek daıyndap jatqanyn baıqaımyz. Ǵylymı-medıtsınalyq ortalyqtar quryldy. Qazir farmakologııa salasyn retteı bastady. Ózbekstan astanasy - Tashkent qalasynda sporttyq salada qyzmet atqaratyn eki ǵylymı-zertteý ınstıtýty bar.
- Keıingi jyldarda elimizde de osy baǵytta oń qadam jasalyp jatqanyn baıqaımyz. Ol jóninde aıtar oıyńyz qandaı?
- Bizdiń elimizde de sportty damytý baǵytynda nátıjeli ister atqarylyp keledi. Árıne, onyń ishinde boks ta bar. Aldaǵy 2028 jylǵy Olımpıadada Qazaqstan aldyńǵy qatardan kórinedi degen oıdamyn. Rasyn aıtaıyq, sport degenińiz barlyq ýaqytta turaqty bola bermeıdi. Keıde bizdiń sportshylar alǵa shyǵýy múmkin. Keleside basqalar joǵarydan kórinedi. Esesine biz ketken qatelikke kóz jiberip, odan sabaq alamyz. Qarlastarymyz myqty bolsa, biz de joǵary nátıjege qol sozamyz. Soǵan kúsh salamyz. Báseke arta túsedi.
- Endigi kezekte ózińiz basqaratyn Olımpıadalyq daıarlaý ortalyǵynyń jumysy jaıynda aıta ketseńiz, munda jas órenderge qandaı qamqorlyq jasalady?
- Ortalyqta boksshylar ózderin Olımpıadaǵa daıyndyq jasap jatqandaı sezinedi degen oıdamyn. Olardyń joǵary jetistikke qol jetkizýine bizde barlyq múmkindik bar. Óıtkeni, munda jastar psıhologııalyq satydan ótedi. Soǵan laıyqty atmosferany sezinedi. Ózine degen senimdilikti kúsheıte túsedi. Sharshy alańǵa shyqqan sátte «men olımpıadalyq qalashyqta daıyndaldym, endi jeńiske jetýim kerek» degen sezimdi boıynda qalyptastyra alady. Bul boksshynyń psıhologııalyq turǵyda jetilýine negiz qalaıdy. Bizdiń ortalyq 420 adamǵa laıyqtalǵan. Aldaǵy ýaqytta oryn sany artyp jatsa, elimizdiń barlyq aımaǵynan talantty jastardy qatarǵa qosa alamyz. Sol arqyly olar ózderiniń tájirıbesin arttyryp, sheberligin shyńdaı beredi.
Ótkende Qazaqstan boks federatsııasynyń konferentsııasy kezinde de ulttyq qurama, 22 jasqa deıingi jáne jastar, jasóspirimder, kishi jasóspirimder qurama ókilderin ortalyqqa shaqyrdym. Meniń ózim de arasynda olardyń daıyndyq barysyn baqylaımyn. Bapkerlermen aqyldasyp, aqyl-keńesimdi aıtamyn.
- Shırek ǵasyrdan astam ýaqyt buryn siz sharshy alańda synǵa tústińiz. Sol kezdegi jáne qazirgi boksshylardyń daıyndyǵy barysynda qandaı aıyrmashylyq jáne ózgeris bar?
- Biz boksshy bolǵan kezeńde Aleksandr Apachınskıı, Tursynǵalı Edilov, Ábdisalan Nurmahanov, Stanıslav Boldyrev syndy myqty bapkerler boldy. Qazir de sol jaqsy úrdistiń jalǵasyp kele jatqany qýantady. Qazirgi bapkerler de sheber boksshylardy tárbıelep keledi. Máselen, Mahmýd jáne Tórehan Sabyrhan sekildi jastar osyndaı bilikti mamandardan tálim aldy. Olar Astanada Nurbek jáne Aıbek Oralbaı sekildi bilikti boksshylardyń shyǵýyna kóp eńbek sińirdi. Sondaı-aq Tarazda Nurlan Aqúrpekov syndy tájirıbeli maman áli kúnge deıin qanshama talantty jasqa jol ashyp keledi. Mundaı bilikti bapkerler elimizdiń barlyq óńirinde kezdesedi.
Alǵashqy kezekte sport mektepteri máselesin qolǵa alýymyz kerek dep oılaımyn. Oǵan aǵa bapkerler taǵaıyndaý máselesine federatsııa nazar aýdarsa deımin. Oǵan qosa, osy mektepterge kimderdiń qabyldanǵanyn baqylaýda ustasaq, talantty jastardy tabýǵa múmkindik arta túsedi.
Qazaqstandyq jankúıerler úshin bokstyń orny erekshe. Ol elimizde joǵary baǵalanady. Sondyqtan keıde syn aıtylyp jatady. Ony janashyrlyq dep sanaımyz. Bul sala mamandarynyń ketken qatelikten sabaq alýyna alyp keledi. Ras, sońǵy eki Olımpıadada bizdiń elimizge bokstan chempıondyq ataq buıyrǵan joq. Ol bizdiń janymyzǵa qatty batady. Degenmen aldaǵy dúbirli dodada jankúıer kóńilinen shyǵatyn nátıjege qol jetkizemiz degen oıdamyn. Qazir myqty boksshylar tolqyny kelip jatyr. Olardyń sany az emes. Erekshe básekelestiktiń arqasynda bizden chempıondar shyǵady.
