Qurlyq áskerinde serjanttardyń jaýyngerlik jáne basqarý daıarlyǵy kúsheıtildi
ASTANA. KAZINFORM – Negizgi is-sharalar josparyna sáıkes Qurlyq áskerleri brıgadalarynyń (polkteriniń, bazalarynyń), serjanttaryn komandırlik daıarlaý jıyny ótkizilýde.
Gvardeısk garnızonynda Qurlyq áskerleri, Áskerı polıtsııa, Qarý-jaraq jáne Tyl basqarmalarynyń, sondaı-aq áskerı-medıtsınalyq bólimsheleri serjanttar quramynyń kásibı biliktiligin arttyrý jáne praktıkalyq daǵdylaryn jetildirý boıynsha mamandandyrylǵan praktıkalyq sabaqtar ótip jatyr. Іs-sharalar jeke quramdy basqarý qabileti men tárbıe jumysynyń sapasyn jetildirýge baǵyttalǵan.
Praktıkalyq sabaqtarda túrli oqý jaǵdaıynda is-qımyl algorıtmderi boıynsha jattyǵýlar ótkizilýde. Baǵdarlamaǵa shaǵyn toptardyń is-qımyl taktıkasy, jaýyngerlik daıarlyqty uıymdastyrý jáne jeke-tárbıe jumysy taqyryptary kirgen. Merzimdi qyzmettegi sarbazdardy oqytýda, kóshbasshylyq qasıetterin jetildirýde, sondaı-aq áskerı ujymnyń tártip pen uıymshyldyqty saqtaýy úshin jaýapkershilikte zamanaýı tásilderge erekshe nazar aýdarylý ústinde. Jıyndy uıymdastyrýshylar serjanttar quramy áskerlerdi basqarýdaǵy mańyzdy býyn ekenin atap ótti.
Olardyń kásibı daıyndyq deńgeıi bólimshelerdiń jaýyngerlik daıarlyǵyna jáne áskerı ujymdaǵy moraldyq-psıhologııalyq ahýalǵa tikeleı áser etedi. Qarýly kúshter Bas shtaby Serjanttar quramymen jumys jónindegi basqarmasynyń bastyǵy sheber serjant Temirbek Halyqov sabaqtar brıgada jáne polk serjanttarymen komandırlik daıarlyq júıesi sheńberinde ótkizilip jatqanyn aıtty. Praktıkalyq atys barysynda qazirgi zamanǵy qarýly qaqtyǵystardyń tájirıbesi qoldanylyp, shaǵyn toptardyń quramynda atys júrgizý jattyǵýlary pysyqtalýda. Atys kúndizgi jáne túngi ýaqyttarda ótkizilip jatyr.
Budan basqa jaýyngerlik daıarlyq boıynsha normatıvter jınaǵyn jańartý, atys baǵytyn ózgertý, jaýyngerlik is-qımyl júrgizýdiń qazirgi zamanǵy ádisterine sáıkes basqa da ózgerister engizý jumystary jalǵasyn tabady. Jıyn qorytyndysy boıynsha qatysýshylardyń daıyndyq deńgeıin taldaý nátıjelerine qaraı, qolbasshylyq úzdik serjanttardy anyqtaıdy. Jıynda jınalǵan tájirıbe áskerı bólimderde praktıkada iske asyrylatyn bolady.
Aıta ketelik sarbazdardyń 300 mln teńgeden astam nesıe tólemi keıinge qaldyrylgan edi.