Qurlyq áskerleriniń bas qolbasshysy elordalyq 102 jastaǵy jalǵyz maıdangerdi quttyqtady
ASTANA. KAZINFORM – «Ardagerlerge taǵzym» respýblıkalyq aktsııasy aıasynda Qurlyq áskerleri bas qolbasshysy basqarmasynyń áskerı qyzmetshileri Astanadaǵy jalǵyz Uly Otan soǵysynyń ardageri Rzaǵul Baıkeshevti Jeńis kúnimen quttyqtady.
Qurlyq áskerleriniń bas qolbasshysy general-maıor Mereke Kóshekbaev maıdangerge Qorǵanys mınıstriniń atynan alǵys hat, estelik syılyq jáne soǵys jyldaryndaǵy aýyr kúnder men maıdandas dostaryn eske túsiretin dalalyq as úlesin tabys etti.
– Sizdiń ómir jolyńyz ben teńdessiz erligińiz biz úshin úlgi-ónege. Siz qazirgi Qazaqstan armııasyndaǵy árbir sarbaz ben ofıtser úshin shynaıy otansúıgishtiktiń jarqyn úlgisisiz, - dep atap ótti general-maıor M. Kóshekbaev.
Soǵys ardagerine Qorǵanys mınıstrligi arnaıy parad uıymdastyrdy. Ortalyq áskerı orkestrdiń saltanatty marshynyń súıemeldeýimen qurmet qaraýyl rotasynyń áskerı qyzmetshileri men Saǵadat Nurmaǵambetov atyndaǵy áskerı kolledjdiń kadetteri sap túzep ótti. Al Ulttyq áskerı-patrıottyq ortalyq Ortalyq ansambliniń ánshileri maıdangerge soǵys jyldaryndaǵy tanymal ánderdi oryndap berdi.
Quttyqtaýlardy jyly qabyldaǵan ardager kórsetilgen qurmet pen yqylas úshin shynaıy rızashylyǵyn bildirdi. Kezdesý sońynda Rzaǵul Baıkeshev halyq dástúrimen áskerı qyzmetshilerge batasyn berip, qyzmetterine tabys jáne táýelsiz Qazaqstannyń órkendeýin tiledi.
Rzaǵul Baıkeshev 1923 jylǵy 18 qazanda Aqtóbe oblysynyń Muǵaljar aýdanynda dúnıege kelgen. Soǵysqa deıin sovhozda qarapaıym jumysshy bolyp eńbek etti.
1943 jyly ásker qataryna shaqyrylyp, Keńes armııasy quramynda Rjev túbindegi shaıqastarǵa jáne Velıkıe Lýkı qalasy mańyndaǵy shabýyldaý operatsııasyna qatysty. Maıdan joly ony Polsha, Rýmynııa jáne Vengrııa arqyly alyp ótken. Soǵysty efreıtor shenimen aıaqtap, elge oralǵan.
Rzaǵul Baıkeshev I jáne II dárejeli Otan soǵysy ordenderimen, Jýkov medalimen jáne kóptegen mereıtoılyq nagradalarmen marapattalǵan.
Soǵystan keıin Aqmola oblysynyń Rojdestvenka aýylynda ekspedıtor bolyp eńbek etti. 1983 jyly zeınetke shyqty.
Eske salsaq, buǵan deıin Qyrǵyzstanda ardagerlerge beriletin birjolǵy tólem somasy belgili bolǵanyn jazǵanbyz.
