Qurlyq áskerlerinde úsh myńnan asa sarbaz Otanǵa adal bolýǵa ant berdi
ASTANA. KAZINFORM — Saltanatty is-shara Shymkent, Gvardeısk, Abaı, Qaraǵandy, Aıagóz, Prıozersk, Óskemen jáne Taraz garnızondaryndaǵy áskerı bólimderde ótti, dep habarlaıdy Qorǵanys mınıstrliginiń baspasóz qyzmeti.
Oǵan Qurlyq áskerleri qolbasshylyǵynyń ókilderi, sarbaz analary komıtetiniń músheleri, Qarýly kúshterdiń ardagerleri, sondaı-aq merzimdi áskerı qyzmetshilerdiń týǵan-týystary men jaqyndary qatysty.
Kóktemgi shaqyrylǵan úsh myńnan astam sarbaz jas jaýynger kýrsynan ótkennen áskerı ant qabyldap, Otanǵa adal bolýǵa jáne ony qorǵaýǵa árdaıym daıyn ekendikterin málimdedi.
31775 áskerı bóliminde áskerı qyzmetshiler men qonaqtardy osy aıtýly oqıǵamen «Astana» óńirlik qolbasshylyǵy áskerleri qolbasshysynyń orynbasary polkovnık Erbolat Sherimbetov quttyqtady.
— Áskerı ant — bul elge qyzmet etýdi, onyń qaýipsizdigi men beıbit bolashaǵyn qorǵaýdy sanaly túrde tańdaý. Sizder Otan qorǵaýshylardyń birneshe býyny qalyptastyrǵan dańqty dástúrlerdi saqtap, ony odan ári jalǵastyrady dep senemiz. Ásker sizderdiń minezderińizdi shyńdap, tártipke baýlyp, shynaıy patrıotızmdi qalyptastyratyn úlken mektep bolady, — dep atap ótti ol.
Bul kún jas sarbazdar úshin ar-namysqa, borysh pen el aldyndaǵy jaýapkershilikke negizdelgen ómirdiń jańa kezeńiniń bastalýyn bildirdi. Qaraǵandy qalasynan Prıozersk garnızonyndaǵy 06708 áskerı bólimine shaqyrylǵan qatardaǵy jaýynger Stanıslav Alenkın óz áserin jetkizdi.
— Ant sózderin aıtqan sátte úlken jaýapkershilikti sezindim. Elime degen maqtanyshym artyp, áskerı boryshtyń mańyzyn tereń túsindim. Komandırlerdiń qoldaýy men týǵandarymnyń qatysýy maǵan senim berdi. Endi abyroımen qyzmet etip, jaqyndarymnyń úmitin aqtaýǵa daıynmyn, — dedi sarbaz.
Áskerı bólimderge kelgen qonaqtar úshin mazmundy baǵdarlama uıymdastyryldy. Áskerı qyzmetshiler jaýyngerlik daıyndyq elementterin, qoıan-qoltyq urys tásilderin, saptyq jattyǵýlardaǵy úılesimdilik pen dáldikti kórsetti.
Áskerı bólimderdiń qolbasshylyǵy ata-analardy uldarynyń qyzmet etý jaǵdaılary týraly jan-jaqty aqparattandyrýǵa erekshe kóńil bóldi. Qonaqtarǵa áskerı bólim aýmaǵyna ekskýrsııa ótkizilip, qarý-jaraq pen áskerı tehnıka, qyzmet etý jaǵdaılary jáne áskerı qyzmetshilerdiń kúndelikti turmys-tirshiligi tanystyryldy.
— Bul men úshin tolqynys pen maqtanyshqa toly erekshe kún. Búgin Otanǵa ant bergen jas sarbazdar elimizdiń tynyshtyǵy men qaýipsizdigin qorǵaý sııaqty qurmetti mindetti atqarady. Olarǵa zor densaýlyq, adal qyzmet jáne rýh myqtylyǵyn tileımin. Sondaı-aq uldarymyzdyń boıyna tártip, jaýapkershilik jáne áskerı boryshqa adaldyq sııaqty asyl qasıetterdi sińirip júrgen komandırlerge shynaıy alǵysymdy bildiremin, — dedi Abaı garnızonyndaǵy 10810 áskerı bóliminde qyzmet etetin sarbazdardyń biriniń anasy Nurgúl Álimbaeva.
Saltanatty rásimge qatysa almaǵandar úshin áskerı bólimderden áleýmettik jeliler men qorǵanys vedomstvosynyń resmı ınternet-resýrstarynda tikeleı efır uıymdastyryldy.
Onlaın translıatsııanyń arqasynda myńdaǵan qazaqstandyq jas sarbazdardyń ómirindegi eń mańyzdy sátterdiń birine kýá bolyp, olardyń áskerı qyzmetindegi jańa kezeńniń bastalý qýanyshyn birge bólisti.
Osyǵan deıin áskerı kafedralardyń 13 myńǵa jýyq kýrsanty Otanǵa adal bolýǵa ant bergenin jazdyq.
