Qurlyq áskerleri Pákistandaǵy áskerı jarysta baq synap jatyr
ASTANA. KAZINFORM – Qazaqstan Qarýly kúshteri Qurlyq áskerleriniń áskerı qyzmetshileri «Pákistan armııasynyń komandalyq rýhy-2024» halyqaralyq jarysyna qatysyp jatyr. Bul týraly Qorǵanys mınıstrliginiń baspasóz qyzmeti málim etti.
Pákistannyń astanasy Islamabadtyń janyndaǵy ejelgi Ravalpındı qalasynda áskerler saıysy ótip jatyr. Atalmysh jarysta Qazaqstan Qarýly kúshteri Qurlyq áskerleriniń áskerı bólimderinen 12 áskerı qyzmetshi qatysyp jatyr.
Áskerı-sporttyq týrnırdiń kezeńderine «qarsylastyń nysanyn anyqtaý», «tosqaýyldaǵy is-qımyl» «artıllerııa atysyn retteý», «jedel medıtsınalyq kómek kórsetý jáne jaralylardy tasymaldaý», «ýchaskeni mınadan tazartý» jáne «túnde sý bógetterin eńserý» kiredi.
Qarsylastar Kalashnıkov avtomatynan atý daǵdylaryn da kórsetedi. Odan basqa marshrýttyń jyldam ótý múmkindigi men tapsyrmalardy pysyqtaý sapasy, ıaǵnı nátıjesi eskeriletin bolady.
Kezeńderdiń sátti oryndalýy bólimsheler quramyndaǵy áskerı qyzmetshilerdiń kúsh-qýaty jáne taktıkalyq daıyndyq deńgeıine baılanysty. Іs-árekettiń úılesimdiligi, tózimdilik jáne komandalyq rýh jeńiske jetý jolynda sheshýshi ról atqarmaq.
«Pákistan armııasynyń komandalyq rýhy-2024» halyqaralyq jarystary 2016 jyldan bastap turaqty túrde ótkizilip keledi. Bul joly jarysqa Bahreın, Iordanııa, Irak, Qazaqstan, Katar, Saýd Arabııasy Koroldigi, Maldıv, Marokko, Pákistan, AQSh, Taıland, Túrkııa, Ózbekstan jáne Shrı-Lanka áskerı qyzmetshileri qatysýda.
