Qurlyq áskeri áskerı ınstıtýtynda dron tehnologııasyn meńgergen mamandar daıarlanyp jatyr
ASTANA.KAZINFORM — Qurlyq áskerleri áskerı ınstıtýtyndaǵy Ushqyshsyz avıatsııalyq júıeler oqý ortalyǵynda zamanaýı tehnologııalardy jetik meńgergen áskerı mamandar daıarlanyp jatyr.
Solardyń biri — kishi serjant Dınara Teleýova. Ol áskerı qyzmettiń er azamattarǵa ǵana tán emes ekenin óziniń bilimimen, kásibıligimen jáne tabandylyǵymen dáleldep keledi.
Jaýyngerlik daıyndyqtyń saptyq, atys jáne taktıkalyq sabaqtarymen qatar, Dınara ushqyshsyz avıatsııalyq júıelerdi meńgerýge erekshe qyzyǵýshylyq tanytady. Ol FPV-drondardy óz qolymen qurastyryp, elektrondyq komponentterin ornatyp, ushý kontrollerlerin baptaıdy jáne alǵashqy synaqtyq ushýy aldynda apparattyń barlyq júıesin muqııat tekserip shyǵady.
— Árbir dron — kúrdeli ınjenerlik júıe. Onyń senimdi jumys isteýi úshin elektronıkany, baǵdarlamalyq qamtamasyz etýdi jáne aerodınamıkanyń negizgi qaǵıdalaryn jaqsy bilý qajet. Bul men úshin jaı ǵana qyzyǵýshylyq emes, el qaýipsizdigine óz úlesimdi qosýdyń bir joly, — deıdi kishi serjant Dınara Teleýova.
Oqý ortalyǵy mamandarynyń aıtýynsha, Dınara joǵary jaýapkershiligimen, tehnıkalyq oılaý qabiletimen jáne únemi izdenip, bilimin jetildirýge degen talpynysymen erekshelenedi. Ol jańa tehnologııalardy tez meńgerip, birneshe jyl buryn tek ınjener mamandardyń salasy sanalǵan zamanaýı jabdyqtarmen senimdi jumys istep júr.
Búginde ushqyshsyz avıatsııalyq júıeler áskerı salanyń mańyzdy baǵyttarynyń birine aınaldy. Osyǵan baılanysty mundaı mamandar daıarlaý isi erekshe mánge ıe. Dınara Teleýovanyń jetistigi — áskerı qyzmetshilerdiń tek jaýyngerlik daıarlyqpen ǵana shektelmeı, ozyq tehnologııalardy ıgerýge de qabiletti ekenin kórsetetin jarqyn úlgi.
Aıta ketelik polıtsııa qyzmetkerleri drondardy basqarý boıynsha daıyndyqtan ótip jatqany týraly jazǵan edik.
