Drondar saıysy: Qurlyq áskeri jańa formattaǵy jarys ótkizdi
ASTANA. KAZINFORM — Qurlyq áskerleriniń «Ońtústik» óńirlik qolbasshylyǵy erekshe saıys uıymdastyrdy. Onda ushqyshsyz avıatsııalyq júıelerdiń áskerı operatorlary FPV-drondardy basqarý sheberligin kórsetti. Bul týraly Qorǵanys mınıstrliginiń baspasóz qyzmeti habarlady.
Bul qolbasshylyqta UUA qyzmeti bir jyl buryn ǵana qurylsa da, búginde jaýyngerlik daıyndyqqa jańa tehnologııalardy engizý turǵysynan jetekshi ról atqarýda. Qyzmet basshysy podpolkovnık Roman Qojahmetovtyń aıtýynsha, qazirgi ýaqytta drondardy baılanysshylar, motoatqyshtar, ınjener-saperler men mehanıkalandyrylǵan bólimsheler belsendi túrde paıdalanyp keledi. Olardyń kómegimen barlaý júrgizilip, artıllerııalyq atysty túzetý, shuǵyl júkterdi jetkizý sııaqty tapsyrmalar oryndalady.
— Biz drondardyń qoldaný aıasyn keńeıtýge basymdyq berdik jáne operatorlardyń daıyndyq deńgeıin barynsha shynaıy jaǵdaıǵa jaqyn ortada tekserý úshin osyndaı jarystardy ótkizý týraly sheshim qabyldadyq, — dep atap ótti podpolkovnık Roman Qojahmetov.
Saıys áserli ekshn-shoýǵa uqsady. Onyń ishinde ushqyshtar joǵary jyldamdyqpen drondardy jerge jaqyn ushyryp, tar ótkelder arqyly ótkizdi. Sonymen birge kúrdeli manevrler jasap, bir mezette komandalyq pýnkterge joǵary sapaly beınetaspa jetkize aldy. Jattyǵýdyń sharyqtaý shegi dronmen 10 metrden asa bıiktikten bronetehnıkanyń qaqpaǵy kólemindegi nysanaǵa oqý granatalaryn dál tıgizý boldy.
Efreıtor Ulan Sýıdýov (12740 áskerı bólimi, Saryozek garnızony), efreıtor Shyńǵyshan Seıdahmetov (66567 áskerı bólimi, Qyzylorda garnızony) jáne serjant Muhamedjan Qyrǵyzalı (Taraz qalasyndaǵy 5-shi mehanızatsııalanǵan brıgada) eń jaqsy nátıjelerdi kórsetti. Komandalyq esepte birinshi oryndy jáne «Ońtústik» óńirlik qolbasshylyǵy áskerleri qolbasshysynyń kóshpeli kýbogyn Jarkent garnızonynyń komandasy jeńip aldy (74261 áskerı bólimi).
«Ońtústik» óńirlik qolbasshylyǵy Qurlyq áskerlerinde mundaı saıystardy alǵash ret uıymdastyrýshy bolyp otyr. «Drondar shaıqasy» formaty áskerı kúshter deńgeıinde dástúrge aınalýy múmkin.
Aıta ketelik Qazaqstan Qarýly kúshteriniń úzdik serjanty anyqtalǵan edi.