Kúrishti kúrmekten aıyra bilýimiz kerek — Prezıdent ǵylymı ataqqa qyzmetiniń arqasynda qol jetkizgender jaıly

ASTANA. QazAqparat - Kúrishti kúrmekten aıyra bilýimiz kerek, ǵylymda kezdseısoq júrgenderden góri, naǵyz ǵalymdarǵa bólinetin qarjyny ulǵaıtqanymyz jón. Bul týraly Memleket basshysy Qasym-Jomart Toqaev Ǵylym jáne tehnologııalar jónindegi ulttyq keńestiń otyrysynda aıtty, dep habarlaıdy QazAqparat Aqordanyń baspasóz qyzmetine silteme jasap.

«Ǵalymdardyń mártebesin dáıekti túrde kóterip, olardy áleýmettik turǵydan qamtamasyz etý sharalaryn kúsheıtýimiz qajet. Osy máselege baılanysty akademıkterdiń pikirimen kelisemin. Ol úshin joǵary oqý oryndary men ǵylymı mekemeler qyzmetkerleriniń ǵylymı dárejesi men ataǵyna qaraı tólenetin ústemeaqyny 1,5 ese arttyrý qajet.

Sonymen qatar kúrishti kúrmekten aıyra bilýimiz kerek. Kómekke, ásirese materıaldyq turǵyda qoldaýǵa laıyq naǵyz ǵalymdar jetkilikti. Sondaı-aq ǵylymı ataqtary bar, biraq ǵylymǵa esh qatysy joq ǵalymdar da bar. Olar týraly keıinirek aıtamyn. Olar bul ataqqa tek ákimshilik, saıası qyzmetiniń arqasynda qol jetkizgen. Sondyqtan olardy shyn ǵalymdarmen shatastyrmaıyq. Ǵylymda kezdseısoq júrgenderden góri, naǵyz ǵalymdarǵa bólinetin qarjyny ulǵaıtqanymyz jón», - dedi QR Prezıdenti.

Sondaı-aq, jer qoınaýyn paıdalanýshylardyń óndiriske jumsaıtyn qarjysynyń 1 paıyzyn ǴZTKJ-ǵa mindetti ınvestıtsııa retinde quıýy keregin aıtty.

«Ýnıversıtetterdi turaqty qarjylandyrýdy qamtamasyz etý úshin maqsatty kapıtal qorlary (endaýment-qorlar) týraly zań jobasyn ázirlegen jón. Ǵylymdy qarjylandyrý kózderin kóbeıtýge, sonyń ishinde jer qoınaýyn paıdalanýshylardyń óndiriske jumsaıtyn qarjysynyń 1 paıyzyn ǴZTKJ-ǵa mindetti ınvestıtsııa retinde quıýyna aıryqsha nazar aýdarý qajet. Bul rette óndirýshi kompanııalardyń atalǵan shyǵyndaryn ortalyqtandyrýdy jalǵastyrý kerek.

Bul oraıda atalǵan qarajat taǵy bir salyq túri retinde qabyldanbaýǵa tıis. Bul – óte mańyzdy. Osy oraıda jer qoınaýyn paıdalanýshylar, sonyń ishinde «Samuryq-Qazyna» qory qarjylandyratyn zertteýlerdi ǵylymı-tehnıkalyq saıasattyń basymdyqtarymen úılestirý úshin tıisti sharalar qabyldaý qajet.

Olardyń ǴZTKJ júrgizý tártibin joǵary oqý oryndary men ǵylymı-zertteý ınstıtýttary úshin ashyq, básekeli ári qoljetimdi etý kerek. Barlyq protsess memlekettik ǵylymı-tehnıkalyq saraptamadan ótkizilip, ǵylymı-tehnıkalyq keńesterde qaralýǵa tıis», - dep atap ótti Memleket basshysy.