Kúrishbaev veterınarııa salasyn damytýǵa arnalǵan usynystar aıtty
«Osyndaı ózgeristerden keıin veterınarııa salasynan veterınarlyq zańnamanyń ústemdigin saqtap qalýdy jáne salanyń epızootııalyq jaǵdaıynyń múddesin qorǵaǵan tájirıbeli mamandar ketýge májbúr boldy. Tıimsiz reformanyń sońy nege alyp kelgenin bizdiń jaǵdaıymyzǵa beıimdelmegen maldy jappaı ımporttap, onymen birge buryn bizde bolmaǵan ekzotıkalyq juqpaly aýrýlardy taratýǵa sep bolǵan «Etti mal sharýashylyǵynyń eksporttyq áleýetin arttyrý» jobasynyń mysalynan kórýge bolady. Osy ýaqytqa deıin qoǵamda ımporttalǵan maldyń qalaı beıimdelgeni týraly, olardyń qanshasy aýrý bolyp shyqqany, qanshasynyń joıylǵany, qandaı aýrý túrlerin ákelgeni jáne qandaı aýqymda taralǵany jóninde aqparattar berilgen joq», - dedi A. Kúrishbaev Senattyń jalpy otyrysynda.
Onyń paıymynsha, brýtsellezge qarsy kúres saıasatyn ózgertý, zerthanalardy ony dıagnostıkalaýdyń az sezimtal ádisterine aýystyrý, shyǵarylǵan qorytyndyny sotta daýlaý normalaryn engizý nátıjesinde brýtsellezdiń taralýy boıynsha eldegi jaǵdaı tek shıelenise tústi. Jýyrdaǵy joǵary patogendi qus tumaýynyń órshýi veterınarııa salasynyń qaýqarsyzdyǵyn aıqyn kórsetti, onyń nátıjesinde qus sharýashylyǵy ónerkásibiniń birqatar kásiporyndary jyldar boıy ósirgen qus basynan aıyryldy, oǵan qosa qazirgi ekonomıkalyq daǵdarys jaǵdaıynda respýblıkalyq bıýdjetten 3,7 mlrd teńge mólsherinde ótemaqy tóleýge májbúr bolyp otyrmyz.
Senatordyń aıtýynsha, Aýyl sharýashylyǵy mınıstrligi tarapynan yqtımal sharalar qabyldanýda, biraq bul máselede búkil Úkimettiń qoldaýy qajet. Eger búgin memlekettik deńgeıde ony qalpyna keltirý boıynsha qajetti sharalar qabyldanbasa, bul halyqtyń densaýlyǵyna áser etýi múmkin.
Depýtat veterınarııalyq ınspektorlardyń jalaqysyn kóbeıtýmen qatar, eńbektiń zııandy jaǵdaılary úshin, olardyń asa qaýipti aýrýlardy juqtyrý qateriniń bolýyn eskere otyryp, ústemeaqy tóleýdi kózdeý qajet ekenin aıtty. Aqylbek Kúrishbaev veterınarııa jáne janýarlardy esepke alý júıesine qazirgi zamanǵy tsıfrlyq tehnologııalardy engizýdi jedeldetý, joǵary oqý oryndarynda veterınarııa mamandaryn daıarlaý júıesin oqý protsesin ǵylymı-zertteý qyzmetimen ıntegratsııalaý, veterınarııalyq zerthanalar júıesin ortalyqsyzdandyrý jáne referenttik-baqylaý fýnktsııalaryn kúsheıtý jolymen reformalaý mańyzdy ekenine toqtaldy.
Sonymen qatar, depýtat elimizde óndiriletin jáne memlekettik tapsyrys boıynsha satyp alynatyn veterınarııalyq preparattardyń sapasyn baqylaýdyń táýelsiz júıesin qurý qajettigine nazar aýdartty.