Kúrish tapshylyǵy bolýy múmkin be

ASTANA. QazAqparat – Búgin Úkimet otyrysynda Qyzylorda oblysynyń ákimi Nurlybek Nálibaev elimizde kúrish baǵasy eki jylda 25 paıyzǵa artqanyn aıtty, dep habarlaıdy QazAqparat tilshisi.

«Óńirdegi topyraqtyń tuzdylyǵy áserinen kúrish pen jońyshqadan basqa daqyldar óse qoımaıdy. Oblys halqynyń 60 paıyzy aýyldarda turatyndyqtan, olardyń negizgi tabys kózi – kúrish egý. Tabıǵı klımattyń jaǵdaıyna qaraı kúrish ósirý baǵyty tańdalǵan. Syrdarııa ózeni basseınindegi sý tapshylyǵyn eskerip, keıingi 2 jylda sýdy az qajet etetin mal azyǵy jáne baqsha ónimderiniń egis kólemin ulǵaıtyp, kúrish kólemin 11 myń gektarǵa azaıttyq. Osynyń saldarynan óńirde óndiriletin ónimniń kólemi men halyqtyń tabysy birshama tómendep, sharýashylyqtardyń bereshek qaryzynyń ósýi jáne tuzdanǵan egistiń jer kóleminiń ulǵaıýy boldy. Respýblıkada kúrishtiń baǵasy 25,8 paıyzǵa ósti.

Sarapshylar ońtústik-shyǵys Azııa elderinde jáne Reseıdiń Krasnodar ólkesinde kúrish egistiginiń kólemi azaıyp, ónim tapshylyǵy 8,7 mln tonna bolatynyn, sondaı-aq Dúnıejúzilik banktiń sarapshylary 2024 jyly kúrishke suranys artyp, baǵanyń ósetinin málimdep jatyr», - dedi Qyzylorda oblysynyń ákimi.

Úkimet otyrysynan keıin tilshiler suraǵyna jaýap bergen Aýyl sharýashylyǵy mınıstri Erbol Qarashókeev kúrish óniminiń kólemi týraly aıtty.

«Jalpy, elimizdiń ishki naryǵy kúrishpen tolyqtaı qamtamasyz etilgen. Sonymen qatar onyń bir bóligin shetelge eksporttap jatyrmyz. Sondyqtan kúrish tapshylyǵy men baǵanyń kúrt sharyqtaýy bolmaıdy. Fermerler kúrishti ýaqytyly ekti. Osy oraıda bıyl jaqsy ónim bolady dep sanaımyz. Ónim jaqsy bolsa, kúrish baǵasynyń 2-3 esege ósýine áser etetin faktorlar joq», - dedi mınıstr.