Kúrish óńdeýshiler qymbat qondyrǵyny satyp alýǵa sýbsıdııa surap otyr
QYZYLORDA. QazAqparat- Qyzylordada aldaǵy ýaqytta ońtústikkoreıalyq qondyrǵynyń kómegimen kúrish qaýyzy óńdelýi múmkin. Bul týraly óńirlik kásipkerler palatasynyń keńesinde aıtyldy, dep habarlady QazAqparat.
«Kúrish qaýyzynda lıgnın elementinen qutylýdyń eki ǵana joly bar: kúrish qaýyzyn maıdalap týraý jáne qatty qysymmen qysýarqyly formasyn buzý. Іzdenis nátıjesinde, ońtústikkoreıalyq kompanııada kúrish qaýyzyn túrlendiretin qondyrǵy bar ekenin bildik. Bul qondyrǵyda lıgnınnen qutylýdyń 2 túri de bar, ıaǵnı maıdalap týraý jáne qatty qysymmen qysý arqyly kúrish qaýyzynyń lıgnındik baılanysyn buzyp, kúrish qaýyzynyń qasıetterin ózgertýge bolady. Nátıjesinde paıda bolǵan kúrish qaýyzy ońaı shirıdi, mal azyǵyna qospa retinde paıdalanǵanda mal titirkenbeı jeıdi jáne asqazanda jeńil qorytylady», - dedi oblystyq kásipkerler palatasynyń basshysy Ǵalymbek Jaqsylyqov.
Atap ótilgendeı, mundaı qondyrǵyny Ońtústik Koreıanyń kúrish óńdeýshileri keńinen qoldanady. Qyzylorda oblysynda osy qondyrǵyny birneshe kompanııa satyp alýǵa nıetti, biraq baǵasy qoljetimdi emes - 100-180 myń eýro.
«Óńirimizdiń ekologııalyq problemalarynyń biri bolyp tabylatyn kúrish qaýyzyn kádege jaratý máselesiniń jalǵyz sheshimi retinde otandyq óńdeýshilerge kúrish qaýyzyn túrlendiretin DPX-30 qondyrǵysyn usynǵan bolar edik. Sonymen qatar, kúrishshilerdi atalmysh qondyrǵyny alýǵa yntalandyrý maqsatynda, onyń qunynyń 50 paıyzyn sýbsıdııalaý týraly Ulttyq kásipkerler palatasyna usynys berip otyrmyz», - dedi ol.
Joǵaryda atalǵan tehnologııamen kúrish qaýyzyn óńdegen jaǵdaıda, kúrish kompanııalarynyń kirisi ósip, ekologııalyq másele sheshimin tappaq.
Kásipkerler palatasy óz tarapynan qajetti qural-jabdyqty jetkizýshi koreıalyq, qytaılyq jáne germanııalyq kompanııalarmen baılanys ornatyp berýge daıyn ekendikterin jetkizýde.
Shara barysynda munan basqa, palatanyń jyl boıyna atqarǵan jumystary men jetken jetistikteri baıandaldy.
