«Quryltaıǵa jol»: ýltramarafonshy Meńdibaı Álimǵazınov Arshaly men Osakarovkada aıaldady
ASTANA. KAZINFORM — «Quryltaıǵa jol» jeke bastamasy ortaq iske aınalyp keledi. Arshaly jurty Meńdibaı aǵany shyǵaryp salyp, al Osakarovka turǵyndary dastarqan jaıyp qarsy aldy.
Quryltaı depýtattarynyń aldaǵy saılaýyna arnalǵan Meńdibaı Álimǵazınovtyń Almatyǵa deıingi ýltramarafony jalǵasyp jatyr. Sportshy áleýmettik jelidegi jeke paraqshasynda jarııalaǵan kezekti jazbasynda baǵyt boıyndaǵy jańa kezdesýler týraly baıandady. Eldi meken turǵyndary onyń saparyn syrttaı baqylap qana qoımaı, birtindep osy bastamanyń bir bóligine aınalyp keledi.
Arshalylyqtar joldyń bir bóligin ýltramarafonshymen birge eńserdi
Meńdibaı aǵaǵa alǵashqylardyń biri bolyp Arshaly kentiniń turǵyndary qoldaý bildirdi. Olar onyń kelýin kútip, júrip ótken jolynan keıin tynyǵyp alýyna múmkindik berdi jáne aq jol tiledi.
Turǵyndar ýltramarafonshyny shyǵaryp sala otyryp, oǵan qoldaý belgisi retinde joldyń bir bóligin birge júgirip ótýdi uıǵardy. Osylaısha, qarapaıym aıaldama sapardyń eń jarqyn sátteriniń birine aınaldy. Jurt Meńdibaı aǵaǵa tek sózben emes, ispen de qoldaý kórsetip, kúrdeli qashyqtyqtyń bir bóligin onymen birge eńserdi.
Jol ústindegi kómek
Jol boıynan ótip bara jatqan júrgizýshiler de beıjaı qalmady. Olar kólikterin toqtatyp, sportshynyń qaıda bet alǵanyn surady, hal-jaǵdaıyn bilip, qajet bolǵan jaǵdaıda kómek usyndy.
Osyndaı árbir kezdesý jańa adamdarǵa «Quryltaıǵa jol» bastamasynyń mánin túsinýge múmkindik berdi. Baǵyt birtindep qonaqjaılyq, janashyrlyq jáne jolaýshyǵa qol ushyn sozýǵa ázirlik týraly shynaıy oqıǵalarmen tolyǵa tústi.
Meńdibaı aǵany Osakarovka kentiniń turǵyndary erekshe yqylaspen qarsy aldy. Jergilikti jurt ýltramarafonshyny qurmetti qonaqtaı qabyldap, aldyna dastarqan jaıdy.
Dastarqan basynda turǵyndar sportshyǵa kúsh-qýat, tózim jáne saparyn sátti jalǵastyrýdy tiledi. Olar onyń qaısarlyǵy men bastaǵan isin sońyna deıin jetkizýge degen tabandylyǵyn atap ótti. Oqıǵaǵa toly kúnnen keıin Meńdibaı aǵa tańerteń Almatyǵa qaraı baǵytyn qaıta jalǵastyrý úshin kentte túnep qaldy.
Jeke jol ortaq iske aınalyp keledi
Bul kezeńdegi oqıǵalar bastamanyń qarapaıym adamı áreketter arqyly qoldaý taýyp jatqanyn kórsetedi. Bireýler onymen birge joldyń bir bóligin júgirip ótse, endi bireýler kómek usyný úshin toqtady, taǵy bireýler jolaýshyny dastarqan jaıyp qarsy aldy.
Osyndaı janashyrlyqtan ortaq jaýapkershilik sezimi qalyptasady. Meńdibaı aǵa óziniń júgirýi arqyly qazaqstandyqtardy el úshin mańyzdy oqıǵadan shet qalmaýǵa shaqyrady. Arshaly men Osakarovka turǵyndary bul úndeýge qoldaý bildirip, ózderiniń ortaq iske qatystylyǵyn kórsetti.
Ýltramarafonshyny alda jańa shaqyrymdar, eldi mekender men kezdesýler kútip tur. Alaıda qazirdiń ózinde bir nárse aıqyn: bir adamnyń isi kóptegen adamdy ortaq ıdeıa tóńiregine biriktire alady.
Buǵan deıin «Astana–Kókshetaý–Astana» baǵytymen 600 shaqyrymdyq joldy júgirip ótken ýltramarafonshy Raýan Ábilhanov tarıhı jetistikke qalaı jetkenin baıandap berdi.
