Quryltaıǵa Úkimetke senimsizdik bildirý quqyǵyn berý usynyldy

ASTANA. KAZINFORM – Senat depýtaty Nurlan Beknazarov Konstıtýtsııalyq reforma jónindegi komıssııanyń ekinshi otyrysynda bir palataly Quryltaıǵa qazirgi Senat pen Májilistiń qandaı ókilettikteri beriletinin aıtty.

- QR Prezıdentiniń usynysy boıynsha beıbitshilik pen qaýipsizdikti saqtaý jónindegi halyqaralyq mindettemelerdi oryndaý úshin QR Qarýly kúshterin qoldaný týraly sheshimdi qabyldaýǵa qatysty qoldanystaǵy normany ózgerissiz qaldyrý usynylady. Parlamenttik reforma jónindegi jumys tobyna túsken usynystar negizinde Parlament Senaty men Májilistiń Konstıtýtsııa baptarynda aıqyndalǵan quzyretterine qatysty keıbir baptar biriktirilip, jetildirildi. Jáne birqatar ókilettikterin Quryltaıǵa berý usynylady, - dedi ol.

Olardyń negizgileri:

- Quryltaı QR Prezıdentiniń saılaýyn jarııalaıdy jáne Respýblıkalyq referendým taǵaıyndaý týraly bastamany kóteredi.

- Quryltaı depýtattary QR Prezıdentine jalpy sanynyń kópshilik daýsymen QR Vıtse-prezıdentin jáne QR Premer-mınıstrin taǵaıyndaýǵa kelisim beredi.

- Sondaı-aq, Prezıdenttiń usynysymen QR Konstıtýtsııalyq sotynyń 10 sýdıasyn, Ortalyq saılaý komıssııasynyń 6 múshesin, Joǵary aýdıtorlyq palatanyń 8 múshesin taǵaıyndaýǵa Quryltaı depýtattary jalpy sanynyń kópshilik daýsymen kelisim berý normasy usynylyp otyr.

- Qazir joǵaryda atalǵan kelisim berý ókilettikteri Senattyń quzyretinde. Ony aldaǵy ýaqytta keńeıtip, bir palataly Parlament – Quryltaıǵa berý palatanyń ókilettigin kúsheıtip, aıqyndaıtyn tıimdi norma dep usynyp otyrmyz, - dedi Nurlan Beknazarov.

Sonymen birge, Quryltaı QR Prezıdentiniń usynysymen QR Joǵary sotynyń sýdıalaryn saılaıdy jáne laýazymynan bosatady, olardyń antyn qabyldaıdy.

Quryltaıǵa Konstıtýtsııalyq sot sýdıalaryn, Joǵary sot sýdıalaryn jáne QR Bas prokýrorynyń usynýy boıynsha Quryltaı depýtattaryn tıispeýshilikten aıyrý máselelerin sheshý ókileti berilmek.

- Konstıtýtsııadaǵy Májilistiń kópshiliktiń daýsymen Úkimetke senimsizdik bildirý quqyǵyn Quryltaıǵa berý usynylyp otyr. Qazaqstan Respýblıkasyndaǵy Konstıtýtsııalyq zańdylyqtyń jaı-kúıi týraly Konstıtýtsııalyq sottyń jyl saıynǵy joldaýyn jáne jylyna eki ret Joǵary aýdıtorlyq palata tóraǵasynyń esebin tyńdaý máselesi de ózgerissiz qaldyrý usynylady, - dedi senator.

Aıta ketý kerek, bul aıtylyp otyrǵan normalardyń bári ázirge usynys qana. Normalardyń qaısysy qabyldanyp, qaısysy Ata zańǵa enbeıtinin referendým sheshedi. Dál qazir Konstıtýtsııalyq reforma jónindegi komıssııanyń ekinshi otyrysy ótip jatyr. 

Kazinform agenttiginiń qazaq jáne orys tilindegi Telegram arnasynda mátin translıatsııasy bolady.

Ótken aptada Konstıtýtsııalyq komıssııanyń alǵashqy otyrysy ótip, bir palataly «Quryltaıdyń» fýnktsııasy men quramy, vıtse-prezıdent laýazymynyń memlekettik bıliktegi orny, zań shyǵarý bastamasyn kóterýge haqyly «Halyq keńesiniń» quzyreti qandaı bolatyny aıtylǵan edi.