Quryltaıǵa kezdeısoq adamdar ótpeıdi – Konstıtýtsııalyq komıssııa
ASTANA. KAZINFORM – Búgin Konstıtýtsııalyq reformalar jónindegi komıssııanyń (Konstıtýtsııalyq komıssııa) kezekti otyrysynda Májilis depýtaty Serik Egizbaev bir palataly Quryltaıdyń artyqshylyǵyn túsindirdi.
– Memleketimizdiń saıası júıesin túbegeıli jańǵyrtatyn, elimizdiń damý baǵytyn aıqyndaıtyn tarıhı kezeńde turmyz. Konstıtýtsııalyq reformalar jónindegi komıssııanyń múshesi retinde atqarylǵan jumystyń aýqymyn, talqylaýdyń deńgeıin kóre otyryp, otandastarymyzǵa bul bizdiń egemendigimizdi nyǵaıtý jolyndaǵy naǵyz jaýapty, qyzý ári jemisti kezeń ekenin nyq senimmen aıta alamyn... Bizge tolassyz kelip túsken 2 myńnan astam usynys pen azamattarmen ótken tikeleı kezdesýlerdi eskersek, qoǵamnyń bul ózgeristerdi qanshalyqty zor yqylaspen kútip otyrǵanyn baıqadyq, - dedi S. Egizbaev.
Onyń aıtýynsha, jańa Konstıtýtsııalyq redaktsııaǵa sáıkes, bir palataly Quryltaı zań shyǵarýshy bılikti júzege asyratyn eń joǵary ókildi organ bolyp bekitildi. Bul jerdegi eń negizgi jańalyq – zań shyǵarý kún tártibin bir ǵana palata qalyptastyrady.
– Bul qadam ne beredi? Birinshiden, zań shyǵarý protsesindegi artyq bıýrokratııany – palatalar arasyndaǵy uzaq kelisimder men kedergilerdi joıady. Ekinshiden, Konstıtýtsııamyz boıynsha memlekettik bıliktiń birden-bir bastaýy – halyq. Al sol halyqtyń atynan sóıleý quqyǵy tek Memleket basshysyna jáne óziniń konstıtýtsııalyq ókilettigi sheginde Quryltaıǵa ǵana tıesili. Bul – Quryltaıdyń saıası salmaǵy men deńgeıin kórsetetin eń basty tetik. Bul degenimiz, Quryltaı jaı ǵana zań qabyldaýshy mekeme emes, ol halyqtyń bılikke tikeleı qatysýyn qamtamasyz etetin, egemendigimizdiń sımvolyna aınalatyn eń joǵary legıtımdi organ ekenin bildiredi, - dedi depýtat.
Osy oraıda ol Quryltaı zańnyń jobalýynan bastap, onyń qabyldanyp, kúshine enýine deıin tolyq jaýapkershilikti óz moınyna alatynyn atap ótti.
– Quryltaıǵa kezdeısoq adamdar emes, partııa súzgisinen ótken óz salasynyń naǵyz mamandary men kásibı kadrlar keledi. Partııalyq tizim - Quryltaıdyń ıntellektýaldyq áleýetin qamtamasyz etetin negizgi tetik. Bul júıe arqyly Parlamentke qoǵamnyń barlyq tobyn, ásirese aýyl mamandaryn jáne bilimdi jastar men belsendi áıelderdi tartamyz, - dedi Serik Egizbaev.
Eske salsaq, jaqynda Prezıdent jańa Parlamentke «Quryltaı» degen ataý berýdi usyndy.