Quryltaıǵa qatysty saılaý bıýdjeti qalaı esepteledi – OSK jaýaby
ASTANA.KAZINFORM – Aldaǵy Quryltaıǵa qatysty saılaý bıýdjeti bıyl kóktemde ótken referendýmǵa jumsalǵan shyǵyndardan asyp túsýi múmkin. Bul týraly QR Ortalyq saılaý komıssııasynyń hatshysy Shavhat Ótemisov málim etti.
Onyń aıtýynsha, aldaǵy saılaýǵa ketetin shyǵyndar Quryltaıdy saılaý merzimi jarııalanǵannan keıin esepteledi.
— Dál qazir naqty somany aıtýǵa negiz joq. Bul rette Quryltaıdy saılaý kúni belgilengeni mańyzdy. Osydan keıin saılaýǵa daıyndalatyn kúnderdiń sany da nazarǵa alynady. Munymen qosa, komıssııa músheleriniń jumys isteıtin kúnderi de nazarǵa alynady. Demek, osynyń bárin eskere otyryp, olardyń alatyn jalaqysy esepteledi, - dedi Sh. Ótemisov Parlamen palatalarynyń birlesken otyrysynan keıin tilshiler suraǵyna jaýap bere otyryp.
Onyń aıtýynsha, saılaý kezeńinde el boıynsha saılaý komıssııasynyń 70 myńnan astam qyzmetkeri jumys isteıdi. Sondyqtan bólingen bıýdjettiń edáýir bóligi olardyń jalaqysyna jumsalady.
Bul rette OSK hatshysy Quryltaıdy saılaý bıýdjeti jańa Konstıtýtsııa boıynsha jaqynda ótken referendýmnyń bıýdjetinen kóbirek bolýy múmkin ekenin atap ótti.
— Meniń oıymsha, bul sál artyq bólinýi múmkin. Barlyǵy saılaý datasyn jarııalaýǵa baılanysty bolady, - dedi ol.
Budan buryn habarlanǵandaı, búgin Parlament palatalarynyń birlesken otyrysynda «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» Konstıtýtsııalyq zań jobasy birinshi oqylymda maquldandy.
