Quryltaıdyń jańa quramy Salyq kodeksine 50 shaqty túzetý engizedi – Serik Jumanǵarın
ASTANA. KAZINFORM – Salyq kodeksine engiziletin túzetýlerdiń bir bóligin Parlamenttiń qazirgi quramy qarastyrady. Al odan tys 50 shaqty ózgeristi Quryltaı saılanǵan soń, jańa quram qabyldamaq. Bul jóninde QR Premer-mınıstriniń orynbasary – Ulttyq ekonomıka mınıstri Serik Jumanǵarın málimdedi.
Onyń sózinshe, Salyq kodeksine qatysty túzetýler Konstıtýtsııadaǵy ózgeristermen baılanysty jáne olar memlekettik organdardyń odan ári jumys isteýi úshin engizilýi qajet.
– Túzetýler qazir Parlament qaraýynda. Olar aldaǵy jumystarǵa kerek bolǵandyqtan, osy sessııada qaralady dep oılaımyn. Sessııa maýsym aıynyń sońynda aıaqtalady. Sodan soń, qujat Memleket basshysynyń qol qoıýyna jiberiledi, – dedi Serik Jumanǵarın Parlament palatalarynyń birlesken otyrysynan keıingi baspasóz máslıhatynda jýrnalıster suraǵyna jaýap bere otyryp.
Sonymen birge, taǵy da ózgerister shoǵyry daıyndalyp jatyr.
– Qazir shamamen 50 túzetýden turatyn jeke paket ázirlený ústinde. Olardy Quryltaıdyń jańa quramymen jyl sońyna deıin engizý josparlanyp otyr, – dedi vıtse-premer.
Úkimettiń málimdeýinshe, salyq zańnamasyn jańartýdaǵy maqsat – salyq júıesiniń tıimdiligin arttyrý jáne qazirgi ekonomıkalyq jaǵdaıǵa beıimdelý.
Aıta keteıik, buǵan deıin Serik Jumanǵarınniń 200 myń bıznes sýbektisi nege jabylǵany jónindegi jaýabyn jarııalaǵanbyz.
