Quryltaıdyń saıası básekedegi róli qandaı – sarapshy pikiri
ASTANA. KAZINFORM – Quryltaı qordalanǵan máselelerdiń sheshilýine yqpal etedi. Bul týraly Jibek Joly telearnasynyń «Búgin Live» baǵdarlamasynda saıasattaný ǵylymdarynyń doktory Ásem Qaıdarova aıtty.
Sarapshynyń pikirinshe, jańa ınstıtýttyń negizgi mindetteriniń biri – eldegi áleýmettik-ekonomıkalyq máselelerdi sheshýge yqpal etý.
– Depýtattar turǵyndardyń áleýmettik-ekonomıkalyq jaǵdaıyn kóterýge jumys isteıdi. Óńirdegi halyqtyń máselesin sheshetin bıýdjetpen baılanysty zańdardyń qabyldanýyna yqpal etedi, – dedi sarapshy.
Osy turǵydan alǵanda, Quryltaı quramyna depýtattardy irikteý kezinde partııalardyń ustanymy men kandıdattardyń kásibı deńgeıine mán berý qajet. Sebebi depýtattyń sapasy onyń halyqtyń máselesin zań shyǵarý deńgeıinde qanshalyqty tıimdi qorǵaı alatynyn aıqyndaıdy. Bul rette zań shyǵarý úderisindegi ózgerister de jańa ınstıtýttyń rólin arttyra túsedi. Buǵan deıin zańdar aldymen Májiliste, keıin Senatta qaralsa, endi bul jumys Quryltaı aıasynda júzege asyrylady.
Básekelestik nazardan tys qalmaıdy. Qazir depýtattyqqa tirkelgen kandıdattar sany – 545, al Quryltaıdaǵy oryn sany – 145. Saılaýǵa 7 partııa qatysyp otyr. Mundaı kórsetkishter saıası básekeniń joǵary ekenin kórsetip, partııalar men kandıdattardyń jaýapkershiligin arttyrady.
– Bul rette partııalardyń zań shyǵarýshy bılikke qanshalyqty yqpal ete alatyny nazar aýdaratyn máselege aınalady, – dedi ol.
Saıasattanýshynyń aıtýynsha, Quryltaıdyń tıimdiligi onyń halyqtyń máselesin bılikke jetkizýmen baılanysty bolmaq.
– Jańa ınstıtýttyń aldynda turǵan basty mindet – bılik pen qoǵam arasyndaǵy baılanysty ashý kerek. Depýtat – halyqtyń ókili. Qoǵamnyń daýysyn bılikke jetkizedi. Sondaı-aq saıası partııalar saıası kezeńde ǵana belsendi bolmaýy kerek, – dedi saıasattanýshy.
Eske salaıyq, Quryltaı saılaýy 23 tamyzda ótedi. Jaqynda oǵan taǵy 405 sheteldik baıqaýshy akkredıtteldi.
