Quryltaıdyń partııalyq jaýapkershiligi kúsheıedi – Aıdos Sarym
ASTANA.KAZINFORM – Quryltaıdyń quramy 145 depýtattan turady, proportsıonaldyq júıe boıynsha saılanady. Bul týraly Parlament palatalarynyń birlesken otyrysynda «Qazaqstan Respýblıkasynyń Quryltaıy jáne onyń depýtattarynyń mártebesi týraly» konstıtýtsııalyq zań jobasyn tanystyrǵan Májilis depýtaty Aıdos Sarym málim etti.
- Elimizdiń tarıhı bolmysyn eskere otyryp, búginde biz el bıliginiń júıesinde «Parlament» sózin «Quryltaı» uǵymyna aýystyryp qaıta engizip otyrmyz. Alaıda, zamanaýı Quryltaı, burynǵy tarıhı Quryltaıdy qaıta qurý emes. Qazirgi Quryltaı - zań shyǵarýshy bıligin júzege asyratyn joǵary ókildi organ retinde jańa mán-maǵynaǵa ıe bolyp, qoǵamdyq bıliktiń konstıtýtsııalyq júıesine kiretin qazirgi zamanǵy ókildi ınstıtýt. Zań jobasyna sáıkes, Quryltaıdyń quramy 145 depýtattan turady, proportsıonaldyq júıe boıynsha saılanady jáne olardyń ókildik merzimi – 5 jyl bolady. Sheteldik tájirıbe kórsetkendeı, Eýropa elderinde osyndaı modelge betburys bar, sebebi mynadaı júıe qoǵamnyń dınamıkasyn nekurlym tolyq ashady, - dedi A. Sarym.
Onyń sózine qaraǵanda, álem elderinde bir palataly parlamentke kóshý - zań shyǵarý protsessiniń ashyqtyǵy men saıası jaýapkershiligin arttyrýǵa degen umtylyspen baılanysty.
- Tarıhı turǵydan qaraıtyn bolsaq, joǵarǵy palatalar ádette, óńirlerdiń ókildigin qamtamasyz etý nemese tereń áleýmettik daǵdarys jaǵdaıynda qosymsha súzgi retinde qurylǵan. Al, parlamenttiń bir palatalyq júıesi ınstıtýtsıonaldyq ınertsııany tómendetedi, óıtkeni zań jobalary bir jerde qaralady jáne qabyldanǵan sheshimder úshin jaýapkershilik palatar arasynda shashyramaıdy. Óz kezeginde, bul saıası protsesti qoǵam úshin neǵurlym túsinikti etip, Quryltaıdyń jeke jáne partııalyq jaýapkershiligin kúsheıtedi. Quryltaı týraly zań jobasynda usynylǵan barlyq normalar el Prezıdenti Qasym-Jomart Toqaev jarııa etken «Kúshti Prezıdent – yqpaldy Parlament – esep beretin Úkimet» qaǵıdatyna tolyq sáıkes keledi. Sonymen qatar, zań jobasy Quryltaıdyń memlekettik bılik organdary júıesindegi ornyn, qyzmetiniń qaǵıdattaryn, qurylymyn, qalyptastyrý tártibin, sondaı-aq onyń ókilettikterin júzege asyrý nysandaryn aıqyndaıdy, - dedi depýtat.
Budan buryn habarlanǵandaı, búgin elordada Parlament palatalarynyń birlesken otyrysy ótip jatyr.
