Quryltaıdyń ár depýtatyna belgili bir óńir bekitiledi
ASTANA. KAZINFORM — Quryltaıdyń ár depýtatyna belgili bir óńir bekitiledi. Bul týraly Quryltaı otyrysynan keıingi brıfıngte depýtat Konstantın Petrov málim etti.
— Quryltaı Reglamentiniń 8-babynda sessııa ishinde óńirlerge keminde 2 sapar bolýy kerektigi jazylǵan. Demek, qyrkúıektiń basynan maýsym aıyna deıin ár depýtat keminde 1 ret óńirlerge sapar jasaıdy, — dedi ol.
Onyń málimetinshe, joǵary zań shyǵarýshy organǵa ótken partııalar depýtattaryn óńirlerge bóledi. Bul jaıynda aqparat halyqqa jetkiziledi.
— Turǵyndar qaı depýtattyń qaı óńirge bekitilgeninen habardar bolady, — dedi Konstantın Petrov.
Ol Quryltaı depýtattarynyń óńirlerge sapary jarııa túrde júrgiziletinin aıtty.
— Árıne, kezdesýler túrli formatta bolady. Jeke qabyldaýlar da, eńbek ujymdarymen kezdesýler de uıymdastyrylady. Eshqandaı shekteý joq, — dedi Quryltaı depýtaty.
Aıta keteıik, joǵary zań shyǵarýshy organnyń búgingi otyrysynda Quryltaı Reglamenti bekitildi. Qujatta depýtattardyń Premer-mınıstrge, Úkimet múshelerine, birqatar basqa memlekettik organdardyń basshylaryna jáne óńir ákimderine saýal joldaýy quqyǵy kózdelgen.
