Quryltaıdyń alǵashqy quramyna aıryqsha jaýapkershilik júkteledi – Prezıdent
ASTANA. KAZINFORM – Quryltaıdyń alǵashqy quramyna aıryqsha jaýapkershilik júkteledi. Bul týraly birinshi shaqyrylymdaǵy Quryltaıdyń birinshi sessııasyn ashqan Memleket basshysy Qasym-Jomart Toqaev aıtty.
– Depýtattar halyqtyń amanatyna adal bolyp, memleket múddesine qyzmet etýi kerek. Bul – anyq aqıqat. Muny eshqashan esten shyǵarmaý qajet, – dedi Prezıdent.
Memleket basshysynyń sózinshe, qazir elimiz damýdyń dańǵyl jolyna tústi. Qazaqstan jańa órleý kezeńine qadam basty.
– Bıyl elimizdiń bolashaǵy úshin mán-mańyzy zor kóptegen tarıhı oqıǵalar boldy. Halqymyz az ýaqyt ishinde bir ult bolyp kóp jumys atqardy. Elimizde jalpyulttyq referendým arqyly aýqymdy konstıtýtsııalyq reforma tabysty júzege asyryldy. Osylaısha, biz naǵyz Halyq Konstıtýtsııasyn qabyldadyq, – dep atap ótti Qasym-Jomart Toqaev.
Jańa Konstıtýtsııanyń óz kúshine enýin tól tarıhymyzdaǵy asa mańyzdy betburys dep baǵalaýǵa bolady. Sonyń nátıjesinde ósip-órkendeýimizge jol ashatyn myqty zańdy negiz qalyptasty.
– Qazirgi zamannyń syn-qaterlerine tótep bere alatyn múlde jańa saıası-quqyqtyq júıeniń irgetasy qalandy. Bul júıe memleket qurylymyn tolyq jańǵyrtyp, bılik ınstıtýttarynyń tıimdiligin arttyrady, sondaı-aq, azamattarymyzdyń el basqarý isine atsalysýyna naqty múmkindik beredi, – dedi Prezıdent.
Aıta keteıik, 23 tamyz kúni elimizde Quryltaı saılaýy ótti. Onyń nátıjesinde 7 saıası partııanyń 5-eýi óz ókilderine depýtattyq mandat alatyn boldy.
Atap aıtqanda:
«Ádilet» partııasynan 110 mandat;
«Aýyl» partııasy 10 mandat;
JSDP 8 mandat;
Respublica partııasy 9 mandat;
«Aq jol» partııasy 8 mandat aldy.
