Quryltaıdy taratý tetigi ne úshin qajet — depýtat túsinikteme berdi

ASTANA. KAZINFORM — Májilis depýtaty Elnur Beısenbaev Konstıtýtsııalyq reformalar jónindegi komıssııa otyrysynda mańyzdy taǵaıyndaýlar buǵattalǵan jaǵdaıda Quryltaıdy taratý tetigi ne úshin qajet ekenin túsindirdi.

Bul qadam halyqaralyq tájirıbege súıene otyryp, ınstıtýtsıonaldyq daǵdarystyń aldyn alý úshin engizilmek. Depýtat AQSh pen Belgııadaǵy saıası daǵdarystardy mysalǵa keltirip, bıýdjet pen mańyzdy sheshimder buǵattalǵan jaǵdaıda memleket pen azamattar zardap shegetinin aıtty. Osyǵan baılanysty Jańa Konstıtýtsııada mundaı tyǵyryqtan shyǵatyn mehanızmder qarastyrylǵanyn aıtty.

— Atap aıtqanda, Quryltaı mańyzdy memlekettik taǵaıyndaýlardy birneshe ret bekitpese, ony taratý tetigi engizildi. Bul ınstıtýtsıonaldyq daǵdarystyń aldyn alý sharasy, — dedi ol.

Sondaı-aq, halyq bıliginiń tetigi kúsheıtilip, respýblıkalyq referendým endi «jalpyhalyqtyq referendým» dep atalatyny aıtyldy.

— Konstıtýtsııaǵa ózgeristi endi Parlament emes, tek halyq qana engize alady, — dedi depýtat.

Aıta keteıik, buǵan deıin Konstıtýtsııa reformasy boıynsha «E-Ótinishke» túsken usynystar sany 4 myńnan asqanyn jazǵan edik.