Quryltaıdan úlken úmit kútemiz — palýan Muhıt Tursynov
ASTANA. KAZINFORM — Belgili palýan, 2014 jylǵy Qazaqstan barysy Muhıt Tursynov Quryltaıdan úlken úmit kútetinin jetkizdi. Bul týraly ol Jibek Joly radıosynyń efırinde aıtty.
— Búgin bizdiń elimizde tarıhı kún. Odan buryn Konstıtýtsııamyz ózgerdi, al osynyń jalǵasy retinde Quryltaı saılaýy ótip jatyr. Endi bir palataly Parlament bolyp, zańdarymyz tez qabyldanady degen oıdamyn. Quryltaıdan úlken úmit kútemiz, — deıdi Muhıt Tursynov.
Onyń aıtýynsha, Konstıtýtsııadaǵy ózgerister is júzinde baıqalyp jatyr. «Zań men tártip» qaǵıdatyna basa nazar aýdarylyp, saıası uıymdardyń belsendiligi artqan. Ulttyq sportta da ıgi ózgerister kútilýde.
— Týrızm jáne sport mınıstrligi basym sport túrlerin belgiledi. Onyń ishinde olımpıadalyq jáne ulttyq sport túrleri bar. Buryn mınıstrlikte 180-deı sport túri bolsa, endi ol qysqartylyp, 60-tan astamy ǵana qalady. Qarajattyń bári naqty ulttyq sport pen olımpıadalyq sport túrlerine bólinedi, — deıdi palýan.
Óz sózinde ol osy ózgeristerdiń arqasynda elimizde tarıhı jeńister kóp bolyp jatqanyn jetkizdi.
— Semserlesýden álem chempıony shyǵyp, mánerlep syrǵanaýdan Mıhaıl Shaıdorov Olımpıadada chempıony boldy. Áli de alda talaı jetistikter kútip tur degen senimdemin. Sondyqtan qazaq eli, bárimiz saılaýǵa qatysyp, óz tańdaýymyzdy jasaıyq, — deıdi Muhıt Tursynov.
Eske salsaq, osyǵan deıin úsh dúrkin álem chempıony Nazym Qyzaıbaı saılaýda daýys bergeni habarlanǵan.
