Quryltaıdaǵy áıelderdiń úlesi 33,8%-ǵa jetti
ASTANA. KAZINFORM- Qazaqstan Respýblıkasy Mádenıet jáne aqparat mınıstrliginde «BUU-áıelder» qurylymynyń Eýropa jáne Ortalyq Azııa elderi boıynsha óńirlik dırektory Belen Sans Lýke jáne onyń orynbasary Elısa Fernandes Saenspen kezdesý ótti, dep habarlaıdy mınıstrliktiń baspasóz qyzmeti.
Delegatsııa quramynda Ortalyq Azııadaǵy úılestirý keńsesiniń basshysy ári qurylymnyń Qazaqstandaǵy eldik keńsesiniń ókili Djeren Gıýven Gıýres jáne «BUU-áıelder» qurylymynyń Qazaqstandaǵy baǵdarlamasynyń jetekshisi Dına Ámrisheva boldy.
Qonaqtardy qarsy alǵan QR Mádenıet jáne aqparat vıtse-mınıstri Evgenıı Kochetov Qazaqstanda áıelderdiń quqyqtaryn qorǵaý men múmkindikterin keńeıtýdiń ulttyq júıesi dáıekti túrde jetildirilip kele jatqanyn atap ótti. Onyń aıtýynsha, áıelderdiń qoǵamdyq jáne saıası ómirge teń dárejede aralasýyna aıryqsha mán berilip otyr.
Kezdesýde memlekettik saıasat aıasynda atqarylǵan jumystardyń nátıjesinde zań shyǵarýshy organ – Quryltaıdaǵy áıelderdiń úlesi 18,9%-dan 33,8%-ǵa deıin artqany aıtyldy.
Sonymen qatar Qazaqstanda osy baǵyttaǵy tetikterdi jetildirý boıynsha atqarylyp jatqan jumystar tanystyryldy. Atap aıtqanda, otbasylyq-turmystyq zorlyq-zombylyq úshin qylmystyq jaýapkershilikti kúsheıtý, genderlik baǵdarlanǵan bıýdjetteýdi engizý jáne zańnamany genderlik saraptamadan ótkizý máseleleri sóz boldy.
Óz kezeginde «BUU-áıelder» ókilderi Qazaqstannyń Ortalyq Azııadaǵy genderlik kún tártibin ilgeriletýge qosqan úlesin jáne óńir elderi arasyndaǵy yntymaqtastyqty damytýǵa belsendi atsalysyp kele jatqanyn atap ótti.
Búginde Qazaqstan men «BUU-áıelder» qurylymy arasyndaǵy áriptestik eki qujat aıasynda jalǵasyp keledi. Olar – BUU Qaýipsizdik Keńesiniń «Áıelder, beıbitshilik jáne qaýipsizdik» kún tártibin iske asyrý jónindegi ulttyq is-qımyl jospary jáne «BUU-áıelder» qurylymymen 2025-2027 jyldarǵa arnalǵan yntymaqtastyq baǵdarlamasy.
Kezdesý sońynda taraptar aldaǵy áriptestiktiń basym baǵyttaryn aıqyndady.
Osyǵan deıin Qazaqstandaǵy kásipker áıelder genderlik teńsizdikti joıý úshin ne isteý qajettigin talqylady.
