Quryltaıda zań jobasyn úsh oqylymda qaraý protsesi qanshalyqty tıimdi – depýtat jaýaby
ASTANA. KAZINFORM – Zań jobasyn úsh oqylymda qaraý tártibi qujatty qabyldaý protsesin uzartyp jibermeı me? Bul suraqqa Quryltaıdyń jalpy otyrysynan keıingi baspasóz máslıhatynda depýtat Snejanna Imasheva jaýap berdi.
- Esterińizde bolsa, buǵan deıin Májilis zań jobalaryn kóbine eki oqylymda qaraıtyn edi. Sodan keıin qujat Senatqa baǵyttalatyn. Endi qazirgi bir palataly júıeni eskere otyryp, bul úsh oqylym zańnyń sapasyn jaqsartý úshin, qujatty jan-jaqty qaraý úshin engizildi, - dedi S. Imasheva.
Bul turǵyda ol úsh oqylymda qaraý zańdy qabyldaý protsesin uzartpaıtynyn aıtty.
- Sebebi, birinshi oqylymda qujat jobasynyń mazmuny qaralady, jalpy erejeleri men halyqqa áseri talqylanady. Birinshi oqylymǵa shyǵarý úshin jaýapty turaqty komıtet 90 kúnnen asyrmaýy kerek. Al endi birinshi jáne ekinshi oqylymnyń arasynda depýtattardyń usynystary, túzetýler egjeı-tegjeıli zertteledi. Sondaı-aq ekinshi jáne úshinshi oqylym arasynda 15 kún merzim bar. Bul rette aýqymdy ózgertýler qaralmaıdy, ıaǵnı tek zań tehnıkasy, zańdardyń ózara sáıkestigi pysyqtalady. Sondyqtan úsh oqylym zańnyń sapasyn qamtıdy jáne tym uzaq talqylaýyn boldyrmaıdy, - dedi depýtat.
Buǵan deıin Quryltaıda zań jobalary úsh oqylymda qaralatynyn jazǵan edik.
