Quryltaıda parlamenttik oppozıtsııanyń kepildikteri aıqyndaldy
ASTANA. KAZINFORM – Búgin elordada Quryltaı Reglamentin qabyldaý kezinde depýtat Snejanna Imasheva parlamenttik oppozıtsııanyń quqyǵyna qatysty túsinik berdi.
- Parlamenttik oppozıtsııanyń kepildikteri - bul da jańa Reglamenttiń mańyzdy bólikteriniń biri. Reglamentte Quryltaıdaǵy kópshilik pen oppozıtsııanyń mártebesi belgilenedi. Depýtattyq mandattyń eń kóp sanyna ıe bolǵan saıası partııa kópshilik dep tanylady. Quryltaıda ókildik etetin jáne kópshilik quramyna kirmeıtin saıası partııalar parlamenttik oppozıtsııa qura alady. Reglament bul mártebeni deklaratıvti túrde bekitýmen ǵana shektelmeıdi, naqty rásimdik kepildikterdi de kózdeıdi. Oppozıtsııa sessııa barysynda keminde bir ret tyńdaý ótkizýge bastama jasaýǵa quqyly. Sonymen qatar sessııa barysynda keminde eki ret Úkimet saǵatynyń kún tártibin aıqyndaýǵa quqyly, - dedi S. Imasheva Quryltaıdyń jalpy otyrysynda.
Onyń aıtýynsha, turaqty komıtetter basshylyǵynda oppozıtsııa ókilderiniń bolýy da qarastyrylǵan.
- Bul balama ustanym bildirý úshin ǵana emes, ony parlamenttik kún tártibine naqty engizý úshin ınstıtýtsıonaldyq múmkindik beredi, - dedi depýtat.
Budan buryn habarlanǵandaı, Quryltaı otyrystary ótetin apta kúnderi bekitildi.
