Quryltaıda orman áleýetin damytý men ekologııalyq qaýipsizdikti qamtamasyz etý máseleleri talqylandy
ASTANA. KAZINFORM — Quryltaıdyń Agrarlyq máseleler, ekologııa jáne tabıǵı resýrstar komıtetiniń uıymdastyrýymen «Orman áleýetin damytý jáne onyń ekologııalyq jáne klımattyq maqsattarǵa qol jetkizýdegi róli» taqyrybynda dóńgelek ústel ótti.
Komıtet tóraǵasy Serik Egizbaev júrgizgen is-sharaǵa BUU-nyń Qazaqstandaǵy turaqty úılestirýshisi Radnaragcha Sarango qatysyp, baıandama jasady. Sondaı-aq Ekologııa jáne tabıǵı resýrstar, Sý resýrstary jáne ırrıgatsııa, Aýyl sharýashylyǵy, Qarjy, Ǵylym jáne joǵary bilim, Eńbek jáne halyqty áleýmettik qorǵaý mınıstrlikteriniń, Halyqaralyq jasyl tehnologııalar jáne ınvestıtsııalyq jobalar ortalyǵynyń, «Atameken» UKP basshylyq ókilderi qatysty.
Jıynda Agrarlyq máseleler, ekologııa jáne tabıǵı resýrstar komıtetiniń tóraǵasy Serik Egizbaev orman resýrstaryn saqtaý, molaıtý jáne tıimdi paıdalaný elimizdiń ekologııalyq qaýipsizdigin qamtamasyz etýdiń mańyzdy baǵyttarynyń biri ekenin atap ótti.
– Sońǵy jyldary elimizde orman órtteri, zańsyz aǵash kesý jáne jerdiń erozııaǵa ushyraýy ózekti máselege aınaldy. Memleket basshysy orman alqaptaryn ulǵaıtýǵa, eldi mekenderdi kógaldandyrýǵa jáne tabıǵı ekojúıelerdi saqtaýǵa erekshe nazar aýdaryp keledi. Búgingi dóńgelek ústeldiń negizgi maqsaty – orman sharýashylyǵy salasyndaǵy ózekti máselelerdi anyqtap, olardy sheshýdiń naqty joldaryn, onyń ishinde zańnamany jetildirý baǵyttaryn aıqyndaý, – dedi Serik Egizbaev.
Dóńgelek ústelde Ekologııa jáne tabıǵı resýrstar vıtse-mınıstri Nurken Shárbıev elimizdegi orman qoryn qalpyna keltirý jáne ulǵaıtý jumystary týraly baıandady. Onyń aıtýynsha, 2021-2025 jyldary elimizde 1 mln gektar aýmaqqa 1 mlrd 648 mln kóshet otyrǵyzylǵan. Bıyl 9 qarashadaǵy jaǵdaı boıynsha taǵy 290 mln kóshet egilgen. Al 2027 jyly 270 mln kóshet otyrǵyzý josparlanyp otyr.
Vıtse-mınıstr 2035 jylǵa qaraı ormanmen kómkerilgen jerlerdiń aýmaǵyn 14,7 mln gektarǵa jetkizý kózdelip otyrǵanyn jetkizdi. Sondaı-aq orman órtiniń aldyn alý úshin 2023-2026 jyldary respýblıkalyq bıýdjet esebinen 2261 tehnıka satyp alynǵanyn atap ótti.
BUU-nyń Qazaqstandaǵy turaqty úılestirýshisi Sarango Radnaragcha orman áleýetin damytý klımattyń ózgerýine qarsy kúres pen bıoalýantúrlilikti saqtaýdyń mańyzdy quraly ekenin aıtty. Ol Qazaqstandaǵy orman alqaptaryn ulǵaıtý jáne Aral mańy ekojúıelerin qalpyna keltirý baǵytyndaǵy jumystarǵa oń baǵa berdi.
– Orman áleýetin damytý – ekologııalyq ornyqtylyqqa, ekonomıkalyq damýǵa jáne bolashaq urpaqtyń ál-aýqatyna salynǵan ınvestıtsııa. BUU júıesi Qazaqstanǵa orman ekojúıelerin saqtaý men qalpyna keltirýde, ozyq tájirıbelerdi engizýde jáne halyqaralyq resýrstardy tartýda qoldaý kórsetýdi jalǵastyrady, – dedi Sarango Radnaragcha.
Shyǵys Qazaqstan oblysy ákiminiń orynbasary Renat Qurmambaev óńirdegi orman qoryn qalpyna keltirý jumystaryna toqtaldy. Onyń málimetinshe, sońǵy bes jylda oblysta 40 mln-nan astam kóshet otyrǵyzylǵan. 2027 jylǵa deıin bul kórsetkishti 76 mln-ǵa jetkizý josparlanǵan. Sonymen qatar óńirde jalpy aýmaǵy 266 gektardy quraıtyn 30 orman tálimbaǵy jumys isteıdi.
Aýyl sharýashylyǵy ǵylymdarynyń kandıdaty Erik Toqmyrzın qalalardy kógaldandyrýdyń ǵylymı negizdelgen júıesine kóshý qajettigin aıtty. Ǵalym qalalardaǵy aǵash-butalardy biryńǵaı orman júıesi júıe retinde qarastyryp, jasyl jelekterdiń jaı-kúıin turaqty baqylaý jáne uzaq merzimdi josparlaý tetikterin engizýdi usyndy.
Talqylaý barysynda depýtattar men basqa da qatysýshylar orman qoryn ulǵaıtý, órt qaýipsizdigin kúsheıtý, tozǵan jerlerdi qalpyna keltirý, orman sharýashylyǵyna jańa tehnologııalardy engizý jáne jeke ınvestıtsııalardy tartý máselelerin talqylady. Ózekti problemalar boıynsha mınıstrlikterdiń ókilderine suraqtar qoıdy.
Jıyn sońynda orman sharýashylyǵy salasynyń qyzmetkerleri men ardagerleri marapattaldy. Elimizdiń orman qoryn qorǵaý men molaıtýǵa, tabıǵı baılyqty saqtaýǵa jáne ekologııalyq turaqtylyqty qamtamasyz etýge qosqan eleýli úlesi úshin sala mamandaryna Quryltaıdyń Agrarlyq máseleler, ekologııa jáne tabıǵı resýrstar komıteti tóraǵasynyń alǵyshattary men Ekologııa jáne tabıǵı resýrstar mınıstrliginiń vedomstvolyq nagradalary tabystaldy.
