Quryltaıda Kaspıı teńizinde baqylaý tetigin kúsheıtý máselesi kóterildi

ASTANA. KAZINFORM – Quryltaı depýtaty Arman Haırýllınniń Premer-mınıstrdiń orynbasary Qanat Bozymbaevtyń atyna Kaspıı teńizin saqtaýǵa baǵyttalǵan ekologııalyq sharalar boıynsha saýal joldady.

«Aqjaıyq» — Kaspıı teńiziniń soltústik jaǵalaýynda ornalasqan biregeı tabıǵı keshen
Foto: Ekologııa jáne tabıǵı resýrstar mınıstrligi

- Sońǵy 25 jylda teńiz akvatorııasy 16 myń sharshy kılometrge azaıdy. Tartylǵan Soltústik Kaspııde shańdy daýyldar jıilep, tuzdy tozań «balshyq jaýyny» bolyp tús3g ;. Osyǵan baılanysty Aral tájirıbesi negizinde kepken aýmaqtarǵa fıtomelıoranttar egý qajet. Álıhan Bókeıhan atyndaǵy ınstıtýt Atyraý óńirin shańdy daýyldardan qorǵaý jobalaryn ázirleý úshin 222,9 mln teńge bólýdi usynyp otyr. Qarjylandyrylýy ázirge qaralmaǵan. Kaspıı balyǵy – azyq-túlik qory, ári memleketimiz úshin mańyzdy eksport kózi. Teńizdiń qazaqstandyq bóliginiń bekire tuqymdas balyqtar úshin bıologııalyq syıymdylyǵy 1 mıllıon tonnadan 5,9 myń tonnaǵa deıin túsip, áleýeti azaıǵan. Kásipshilik qara balyq kólemi tek sońǵy 6 jylda 29 paıyzǵa azaısa, Kaspıı ıtbalyǵy 20 ǵasyr basyndaǵy 1 mıllıonnan 270 myńǵa deıin qysqardy. Buǵan brakonerlikpen qatar, shelftegi kómirsýtekterdi keń kólemde óndirý de áser etip jatyr, - dedi Arman Haırýllın Quryltaıdyń jalpy otyrysynda.

Onyń aıtýynsha, teńizde aýa men sýdyń sapasyn baqylaıtyn birde-bir statsıonarly stantsııa joq. «Qazgıdromet» monıtorıngti tek jaǵalaýdaǵy 50 núktede júrgizedi. Munaı óndirýshi araldardyń aınalasynda ekologııalyq baqylaý beketterin ornatý – búgingi kúnniń talaby.

- Soltústik Kaspııde fıtomelıoratsııa arqyly shańdy daýyldardan qorǵaý jobalaryn ázirlep, ári qaraı júzege asyrýdy qarjylandyrý kerek. Kaspıı teńizinde ken oryndary aınalasynda memlekettik statsıonarly baqylaý beketterin ornatý baǵdarlamasyn ázirleý mańyzdy. Іri kompanııalardyń ekologııalyq saqtandyrý sommalaryn halyqaralyq standartqa sáıkestendirip, ekologııalyq aqparat ashyqtyǵyn qamtamasyz etý qajet, - dedi depýtat.

Buǵan deıin habarlanǵandaı, Kaspıı teńiziniń sý bıoresýrstary jónindegi komıssııaǵa Ázerbaıjan tóraǵalyq etedi.