Quryltaıda etıkany buzǵandarǵa qandaı shara qoldanylady
ASTANA. KAZINFORM – Depýtattyq ádep qaǵıdalaryn saqtamaǵandar suraq qoıý, saýal joldaý tárizdi múmkindikterinen ýaqytsha aırylady. Bul jóninde QR Parlamenti Májilisiniń depýtaty Aıdos Sarym málimdedi.
Onyń sózinshe, «Qazaqstan Respýblıkasynyń Quryltaıy jáne onyń depýtattarynyń mártebesi týraly» konstıtýtsııalyq zań jobasynda Depýtattyq ádep keńesiniń jumys tártibi jazylǵan.
Qujatqa saı, Quryltaıda depýtattarǵa qyzmetine qatysy joq jeke máseleleri boıynsha sóz sóıleýge tyıym salynady.
– Aldaǵy ýaqytta Quryltaı saılanǵan soń, eń aldymen, depýtattyq ádep jónindegi qujatty qabyldaıtyn shyǵar. Ol ár depýtattyń ústelinde jatady. Atalǵan qaǵıdada depýtatqa qashan jáne qansha ýaqyt málimdeme jasaýǵa bolady t.b. erejeler qamtylady. Quryltaı minberinde jeke máselelerdi kóterýge bolmaıdy degen norma qazirdiń ózinde zań jobasyna engizildi, – dedi depýtat.
Sonymen qatar, Aıdos Sarym tártip buzǵandarǵa qoldanylatyn sharalar jóninde aıtty.
– Aıyppul salý qarastyrylmaǵan. Biraq odan ózge birqatar shara bar. Mysaly, sógis berýdi ataýǵa bolady. Ne bolmasa, Quryltaıdyń bir ne úsh otyrysynda suraq qoıý, saýal joldaý, málimdeme jasaý múmkindiginen aırylady. Tártip buzǵan depýtattyń jaı ǵana mıkrofony qosylmaıdy. Demek, bul ınstıtýt jańa parlamenttik jáne saıası mádenıetti qalyptastyrýy tıis, – dedi ol.
Aıta keteıik, buǵan deıin «Qazaqstan Respýblıkasynyń Quryltaıy jáne onyń depýtattarynyń mártebesi týraly» konstıtýtsııalyq zań jobasy maquldanyp, sonyń aıasynda depýtattyq ádep qaǵıdalary bekitiletinin jazǵanbyz.
