Quryltaı jumysynyń alǵashqy kezeńi 1 shildede bastalady
ASTANA. KAZINFORM — Elorada jańa Konstıtýtsııanyń memlekettik basqarýdy damytýdaǵy róli talqylanǵan halyqaralyq konferentsııa ótti. Іs-shara QR Ulttyq akademııalyq kitaphanasynda uıymdastyryldy.
Jıynda jańa Konstıtýtsııanyń kúshine enýimen birge júzege asatyn saıası reformalar sóz boldy. Atap aıtqanda, Vıtse-prezıdent ınstıtýtyn engizý, Halyq keńesin qurý jáne Parlamentti Quryltaı retinde jańǵyrtý máseleleri talqylandy.
Іs-sharaǵa QR Prezıdenti Ákimshiligi, Konstıtýtsııalyq Sottyń sýdıalary, Parlament Májilisiniń depýtattary men QR Ádilet mınıstrliginiń ókilderi qatysty. Olar konstıtýtsııalyq reformalardyń memlekettik basqarý júıesin jetildirýdegi mańyzyn sóz etti.
Qazaqstan zańgerler odaǵynyń tóraǵasy Serik Aqylbaı jańa Konstıtýtsııany iske asyrý baǵytynda barlyq negizgi zańnamalyq tetik qalyptasqanyn jetkizdi.
— Biz jańa Konstıtýtsııany qabyldadyq. Oǵan sáıkes qajetti konstıtýtsııalyq zańdar ázirlenip, qabyldandy. Negizgi zańnamalyq baza tolyq qalyptasty. Endi el jańa Konstıtýtsııa talaptaryna sáıkes jumys isteı bastaıdy. Birinshi kezektegi másele – Quryltaıdyń jumysy. 1 shildeden bastap Quryltaıdyń alǵashqy daıyndyq kezeńi bastalady. Túsindirý jumystary júrgizilip, arnaıy toptar qurylyp, olar respýblıka aýmaǵynda jumys atqarady, — dedi ol.
Serik Aqylbaı óz sózinde Halyq keńesin qurý jumystary qyrkúıek aıynda bastalatynyn da atap ótti.
— Bul týraly Prezıdent te óz sózinde atap ótti. Zańnamaǵa sáıkes Halyqtyq keńesti qurý qyrkúıek aıynda ǵana múmkin bolady. Qajetti zań qabyldanyp, kúshine engenimen, keńesti jasaqtaý jumystary kúzde bastalady, — dedi Serik Aqylbaı.
Al Májilis depýtaty Marat Bashımov kásibı parlament qalyptastyrý Memleket basshysy aıqyndaǵan negizgi mindetterdiń biri ekenin aıtty.
— «Kásibı parlament» uǵymynyń mańyzy erekshe. Parlament tek zań shyǵaratyn organ emes, qoǵam aldyndaǵy jaýapkershilikti sezinetin mańyzdy ınstıtýt. Bul depýtattarǵa da úlken jaýapkershilik júkteıdi. Eń bastysy, munyń barlyǵy Konstıtýtsııada naqty kórsetilgen, — dedi depýtat.
Konferentsııa qorytyndysy boıynsha sarapshylar zańnamany jetildirý, quqyqtyq retteýdiń tıimdiligin arttyrý jáne zań shyǵarý qyzmetiniń ǵylymı negizin kúsheıtýge baǵyttalǵan usynymdar qabyldady.
Aıta keteıik, jıynda Ádilet mınıstri Erlan Sársembaev konstıtýtsııalyq reformany iske asyrý kezeńderi týraly da aıtty.
