Quryltaı jumysyn tsıfrlandyrý qalaı júredi
ASTANA. KAZINFORM — Quryltaı jumysyn tsıfrlandyrý jáne e-Quryltai júıesin engizý máseleleri týraly Quryltaı depýtaty Snejanna Imasheva túsindirdi.
Quryltaıdyń jalpy otyrysynan keıin tilshiler Prezıdent e-Quryltai júıesin engizý týraly birneshe ret aıtqanyn atap ótip, bul baǵyttaǵy jumystyń qalaı júrgiziletinin jáne zań shyǵarý qyzmetin tsıfrlandyrý máseleleri Reglamentte qalaı qamtylǵanyn surady.
Snejanna Imashevanyń aıtýynsha, tsıfrlandyrýǵa qatysty birqatar norma Quryltaı Reglamentinde kórinis tapqan. Atap aıtqanda, depýtattardyń usynystar men tıisti materıaldardy usyný tártibi naqtylanǵan. Qujattar men túrli usynystardy jazbasha túrde ǵana emes, tsıfrlyq formatta da joldaýǵa múmkindik bar.
Sonymen qatar depýtat e-Quryltai júıesi boıynsha jumys júrgizilip jatqanyn atap ótti. Onyń sózinshe, tsıfrlandyrý máseleleriniń barlyǵy Reglamentte jeke-jeke kórsetilmegenimen, Quryltaı qyzmetinde bul baǵytqa erekshe mán berilip otyr.
— Reglamenttiń mazmunyna qarasaq, túrli usynystar men hattardy jazbasha nemese tsıfrlyq formatta jiberýge bolady, ıaǵnı Quryltaı jumysyn tsıfrlandyrý baǵyty qalyptasyp keledi, — dedi S. Imasheva.
Ol sondaı-aq Tsıfrlandyrý, ınnovatsııalar jáne ǵylym komıteti Reglamentte jeke atalmaǵanymen, tsıfrlandyrýǵa qatysty máseleler osy komıtettiń qaraýyna jatatynyn aıtty.
Eske salsaq, Memleket basshysy Qasym-Jomart Toqaev birinshi shaqyrylymdaǵy Quryltaıdyń birinshi sessııasynyń ashylýynda «E-Parliament» aqparattyq júıesi ázirlenip jatqanyn aıtty. Bul júıe túıtkilderdi zań arqyly aldyn ala retteýge múmkindik beredi. Basty maqsat — tsıfrlyq qyzmetterdi bir jerge toǵystyrý.
