Quryltaı janyndaǵy Qoǵamdyq palatanyń bólek bıýdjeti bola ma
ASTANA. KAZINFORM — Qoǵamdyq palatanyń jumysyna bólek bıýdjet qarastyryla ma? Quryltaı otyrysynan keıingi baspasóz máslıhatynda tilshiler tarapyna qoıylǵan osy saýalǵa depýtat Aıdos Sarym jaýap berdi.
Onyń atap ótýinshe, Qoǵamdyq palatanyń jumysyna bólek bıýdjet qarastyrylmaıdy. Quryltaı jumysyna bólingen qarajat pen qolda bar múmkindikter palat jumysynada da paıdalanylady.
— Kúndelikti jumysymyzǵa qajetti jaǵdaılardy aıtatyn bolsaq, mysaly, otyrys ótkizý úshin úlken zal, mıkrofondar jáne translıatsııa qajet. Keı jaǵdaıda mańyzdy sarapshyny shaqyrý úshin onyń jol shyǵynyn óteý kerek bolýy múmkin. Budan basqa aıtarlyqtaı shyǵyn kórip otyrǵan joqpyz, — dedi Aıdos Sarym.
Sonymen qatar ol Qoǵamdyq palata men depýtattar arasynda pikir qaıshylyǵy týyndaǵanda sońǵy sóz kimde bolatynyn túsindirdi. Onyń aıtýynsha, Qoǵamdyq palatanyń erejesine sáıkes, daýys berý kezinde taraptardyń daýysy teń tússe, Palata tóraǵasynyń daýysy sheshýshi bolady.
— Óz tájirıbemde mundaı jaǵdaı bolǵan emes. Sarapshylar óz múmkindigi men áleýetin jaqsy biletin azamattar. Olar munda daýlasý úshin emes, óz pikirin naqty jetkizý nemese ózderi ókildik etetin qoǵamdyq ne sarapshylyq qaýymdastyqtyń ustanymyn bildirý úshin keledi, — dedi ol.
Depýtattyń aıtýynsha, Qoǵamdyq palatanyń jumysy otyryspen ǵana shektelmeıdi. Sarapshylardyń negizgi mindetteriniń biri — tıisti zań jobalary boıynsha jumys toptaryna qatysyp, memlekettik organdarmen birlesip jumys isteý.
— Árıne, pikir qaıshylyǵy bolǵan kezder, ózara kelispeýshilikter kezdesti. Biraq negizinen sarapshylardyń syny men usynystary memlekettik organdarǵa baǵyttalatyn. Al depýtattarmen, kerisinshe, tyǵyz jumys istep, jaqsy qarym-qatynas ornady, — dedi Aıdos Sarym.
Aıta keteıik, búǵan deıin Aıdos Sarym Qoǵamdyq palata men Halyq Keńesiniń mindetteri bir-birin qaıtalamaıtynyn aıtqan edi.
