Quryltaı janynan máslıhattarmen ózara is-qımyl jónindegi keńes qurylady
ASTANA. KAZINFORM — Quryltaıdyń jalpy otyrysynda máslıhattarmen ózara is-qımyl jónindegi keńes qurý týraly qaýly qabyldandy.
— Jergilikti ókildi organdar retinde máslıhattar halyqpen tikeleı jumys isteıdi, óńirlerdiń ózindik erekshelikterin biledi jáne biz qabyldaǵan zańnamalyq sheshimderdiń is júzinde qalaı júzege asyrylatynymen betpe-bet keledi. Qazaqstan Respýblıkasy Quryltaıynyń janyndaǵy máslıhattarmen ózara is-qımyl jasaý jónindegi keńesti naqty osyndaı turaqty ózara is-qımyl jasaý tetigi retinde qurylady, — dedi qaýlyny tanystyrǵan Quryltaı depýtaty Ámirbek Ospanbekov.
Onyń sózinshe, bastamanyń negizgi maqsaty — Qazaqstan Halyq Keńesiniń alǵashqy otyrysynda Prezıdent aıtqan óńirler men ortalyq memlekettik organdar arasynda tikeleı baılanysty qamtamasyz etý jónindegi tapsyrmany iske asyrý.
Keńes máslıhattardyń zańdardy ázirleýge turaqty qatysýyn jáne qabyldanǵan zańdardyń jergilikti jerlerde is júzinde qoldanylýy boıynsha keri baılanys alýdy jolǵa qoıady. Sondaı-aq júıeli sheshimder ázirleý úshin óńirlerdegi problemalardy anyqtap, jınaqtap otyrady. Keńestiń mindetine óńirlerdegi tabysty tájirıbeni zerdeleý men ony taratýǵa yqpal etý de kiredi.
Keńes quramyna máslıhattarda jumys isteý nemese olarmen ózara is-qımyl jasaý tájirıbesi bar Quryltaıdyń turaqty komıtetteriniń depýtattary, saıası partııalar men memlekettik organdardyń ókilderi, sondaı-aq Astana qalasynyń, oblystar men respýblıkalyq mańyzy bar qalalardyń máslıhat tóraǵalary kiredi.
Óńirlermen turaqty baılanys ornatý úshin Quryltaıdyń tórt depýtatynan turatyn hatshylyq qurylady. Olardyń árqaısysyna bes óńirden bekitiledi.
Qajet bolǵan jaǵdaıda jekelegen máselelerdi qaraý úshin taqyryptyq jumys toptary qurylýy múmkin. Olardyń jumysyna Quryltaı men máslıhat depýtattary, sarapshylar, azamattyq qoǵam, memlekettik organdar men uıymdardyń ókilderi tartylady.
Aıta keteıik, buǵan deıin Quryltaı memlekettik nagradalar týraly zań jobasyn maquldaǵanyn jazǵanbyz.
