Quryltaı janynan Qoǵamdyq palata quryldy

- Rasynda, azamattyq qoǵammen jáne saraptamalyq qoǵamdastyqpen ózara is-qımyl jasaý zań shyǵarý isiniń, jalpy depýtattyq jumystyń mańyzdy bóligine aınalǵan. Mundaı tájirıbe kóptegen shaqyrylymdar boıy qalyptasty. Sońǵy jyldary bul jumysty Májilis janyndaǵy Qoǵamdyq palata men Senat janyndaǵy Sarapshylar klýby júıeli júrgizdi. Atalǵan alańdar jemisti dıalogqa, qujattardy muqııat pysyqtaýǵa jol ashyp, óziniń qajettiligin kórsetti. Olar parlamenttik jumysqa bedeldi sarapshylardy, ǵalymdardy, qoǵam qaıratkerlerin, úkimettik emes sektor ókilderin tartýǵa múmkindik berdi. Olarmen birge zań jobalary men qoǵamdy tolǵandyrǵan ózekti máseleler jan-jaqty talqylandy. Memleket basshysy bul dıalog alańdarynyń jumysyna joǵary baǵa berip, olardyń zań jobalaryn mazmundy talqylaýǵa jáne jan-jaqty saraptamadan ótkizýge yqpal etkenin atap ótti. Sondyqtan búginde osy alańdar aıasynda jınaqtalǵan ozyq tájirıbeni saqtap, bul jumysty ary qaraı Quryltaı qyzmeti aıasynda jalǵastyryp, ony jańa deńgeıge kóterý mańyzdy. Álemdik tájirıbe kórsetip otyrǵandaı, qazirgi tańda qoǵamdyq palatalar ınstıtýty keńinen damyǵan, - dedi depýtat Aıdos Sarym Quryltaıdyń jalpy otyrysynda.

Onyń paıymynsha, dál osyndaı birlestikter azamattar men bılik arasyndaǵy senimdi kópir qyzmetin atqaryp, qoǵamnyń naqty suranystary men ustanymdaryn naqty kórsetetin mańyzdy ındıkatorǵa aınalyp otyr. Osyǵan baılanysty Qoǵamdyq palata depýtattardyń sarapshylarmen, ǵylymı qaýymdastyqpen, azamattyq qoǵam, kásibı birlestikter jáne óńirler ókilderimen tikeleı dıalog júrgizetin turaqty jumys alańyna aınalýǵa tıis. Palatanyń negizgi mindetteriniń biri – zań jobalaryna qoǵamdyq jáne saraptamalyq zerdeleý júrgizý bolýy kerek. Bul eń mańyzdy zańnamalyq bastamalar boıynsha balama ustanymdardy, kásibı baǵalaýlardy, yqtımal eskertýler men usynystardy aldyn ala eskerýge múmkindik beredi.

- Osy rette Qoǵamdyq palatanyń Quryltaıdyń turaqty komıtetterimen ózara baılanysy aıryqsha mańyzdy. Sarapshylar zań jobalaryn talqylaý protsesine tikeleı qatysyp, depýtattarmen birlesip jumys isteýge, naqty usynystar engizýge múmkindik alýǵa tıis. Osylaısha, syndarly ıdeıalar odan ári zań shyǵarý protsesi aıasynda qaralatyn bolady. Sonymen birge Palatanyń jumysy tek zań jobalarymen shektelmeýge tıis. Onyń alańynda qoǵamdyq-saıası jáne áleýmettik-ekonomıkalyq damýdyń eń ózekti máselelerin talqylaý qajet. Eń aldymen, bul – kásibı saraptamany, ashyq pikirtalasty jáne qoǵammen keri baılanysty qajet etetin máseleler. Sondyqtan Palata quramynda keń aýqymdy ókildikti qamtamasyz etý mańyzdy. Quryltaı janyndaǵy Qoǵamdyq palatany 50 adamnan qurý usynylady. Onyń quramyna barlyq saıası partııalar fraktsııalarynan Quryltaı depýtattaryn, azamattyq qoǵam men sarapshylar qaýymdastyǵynyń, úkimettik emes jáne kásibı uıymdardyń, óńirlerdiń ókilderin, sondaı-aq túrli salalardyń mamandaryn engizý usynylady. Qajet bolǵan jaǵdaıda, jekelegen máseleler men salalyq taqyryptardy talqylaýǵa bedeldi ǵalymdardy, sala mamandaryn, memlekettik organdar men qoǵamdyq birlestikterdiń ókilderin qosymsha tartýǵa bolady. Bul Palatanyń saraptamalyq áleýetin arttyra túsedi, - dedi depýtat.

Jalpy otyrysta depýtattar Qoǵamdyq palata qurý týraly usynysty qoldady.

Budan buryn habarlanǵandaı búgin Quryltaıdyń jalpy otyrysynda Dúnıejúzilik saýda uıymyna qatysty zań jobasy birinshi oqylymda maquldandy.