Quryltaı Úkimet kelisiminsiz bıýdjetti ózgerte almaıdy – Konstıtýtsııalyq reforma

ASTANA. KAZINFORM – Senat depýtaty Nurlan Beknazarov Konstıtýtsııalyq reforma jónindegi komıssııanyń ekinshi otyrysynda Quryltaıdyń bıýdjet saıasatyndaǵy orny qandaı bolatynyn aıtty.

- Memlekettik kiristerdi qysqartýdy nemese memlekettik shyǵysty ulǵaıtýdy kózdeıtin zań jobalary QR Úkimetiniń oń qorytyndysy bolǵan kezde ǵana engizilýi múmkin. QR Prezıdentiniń zań shyǵarý bastamasymen Quryltaıǵa engizilgen zań jobalary úshin mundaı qorytyndy talap etilmeıdi. Bul qoldanystaǵy tártipti saqtaý úshin de usynylyp otyr, - dedi depýtat.

Onyń aıtýynsha, quryltaı qaraǵan zań qabyldaný úshin keminde úsh oqylymda qaralý kerek.

- QR Konstıtýtsııasyna ózgerister men tolyqtyrýlar engizý týraly máseleler jáne zań jobalary boıynsha keminde úsh oqylym ótkizilýin mindetteıtin norma engizilip otyr. Úsh oqylymda qaraý zańnyń sapasyn, jedel qabyldaýyn, tıimdiligin arttyrady dep kútilýde, - dedi Nurlan Beknazarov.

Aıta ketý kerek, bul aıtylyp otyrǵan normalardyń bári ázirge usynys qana. Normalardyń qaısysy qabyldanyp, qaısysy Ata zańǵa enbeıtinin referendým sheshedi.

Dál qazir Konstıtýtsııalyq reforma jónindegi komıssııanyń ekinshi otyrysy ótip jatyr.

Kazinform agenttiginiń qazaq jáne orys tilindegi Telegram arnasynda mátin translıatsııasy bolady.

Ótken aptada Konstıtýtsııalyq komıssııanyń alǵashqy otyrysy ótip, bir palataly «Quryltaıdyń» fýnktsııasy men quramy, vıtse-prezıdent laýazymynyń memlekettik bıliktegi orny, zań shyǵarý bastamasyn kóterýge haqyly «Halyq keńesiniń» quzyreti qandaı bolatyny aıtylǵan edi.