Quryltaı tóraǵasynyń orynbasarlary saılandy
ASTANA. KAZINFORM – Búgin Quryltaıdyń jalpy otyrysynda joǵary zań shyǵarýshy organ tóraǵasy Aıbek Dádebaıdyń úsh orynbasary saılandy. Olar: Nurlan Beknazarov, Dánııa Espaeva jáne Dınara Zákıeva.
— Kelesi qaraıtyn máselemiz — Qazaqstan Respýblıkasy Quryltaıy tóraǵasynyń orynbasarlaryn saılaý týraly. «Qazaqstan Respýblıkasynyń Quryltaıy jáne onyń depýtattarynyń mártebesi týraly» Konstıtýtsııalyq zańnyń 11-babynyń 5-tarmaǵyna sáıkes Quryltaı tóraǵasynyń úsh orynbasary bolady. Olar tóraǵanyń usynýy boıynsha Quryltaı depýtattarynyń jalpy sanynyń kópshilik daýysymen saılanady. Sondyqtan ózime berilgen quqyqty paıdalana otyryp, Qazaqstan Respýblıkasy Quryltaıy tóraǵasynyń orynbasary laýazymyna aldymen Quryltaı depýtaty Nurlan Beknazarovtyń kandıdatýrasyn usynamyn. Nurlan Qudııaruly — belgili memleket qaıratkeri, kásibı biliktiligi mol maman, depýtat retinde de tájirıbesi kóp. Eki ret Parlament Senatynyń depýtaty bolyp saılanǵan, Konstıtýtsııalyq zańnama, sot júıesi jáne quqyq qorǵaý organdary komıtetiniń tóraǵasy bolǵan, — dedi Aıbek Dádebaı.
Ol ekinshi orynbasary laýazymyna bilikti ekonomıst, kóp jyl basshylyq qyzmette bank sektorynda jumys istegen, Parlamenttiń sońǵy saılanymdarynda Májilis tóraǵasynyń orynbasary bolǵan «Aq jol» partııasynyń tóraǵasy Dánııa Espaevany, úshinshi orynbasar laýazymyna kópshilikke keńinen tanymal qaıratker tulǵa, qoǵamdyq jáne qaıyrymdylyq salasynda tájirıbesi mol, Májilis depýtaty bolǵan Dınara Zákıevany usyndy.
Úsh kandıdatýra da depýttardyń basym daýysymen Quryltaı tóraǵasynyń orynbasary laýazymdaryna saılandy.
