Quryltaı tóraǵasynyń laýazymyna qatysty máseleler jeke bapta retteledi – Konstıtýtsııalyq komıssııa

ASTANA. KAZINFORM – Zań shyǵarý bastamasy quqyǵyna ıe sýbektilerdiń qatary anyqtaldy. Bul týraly Konstıtýtsııalyq reformalar jónindegi komıssııanyń otyrysynda Konstıtýtsııalyq Sot tóraǵasynyń orynbasary Baqyt Nurmuhanov málim etti. 

– 49-bap Vıtse-Prezıdenttiń quqyqtyq mártebesi men ókilettikterine arnalady. Bir palataly Parlament modeline arnalǵan normalar tórtinshi «Quryltaı» degen bólimde jınaqtaldy. Onda zań shyǵarý organynyń ókilettikteri bekitildi, - dedi Baqyt Nurmuhanov jańa Konstıtýtsııanyń sońǵy nusqasyn tanystyrý kezinde.

Onyń aıtýynsha, Quryltaıdyń sessııalaryna jáne onyń qyzmetin uıymdastyrýǵa qatysty baptardyń barlyǵy derlik jańartyldy.

– Zań shyǵarý bastamasy quqyǵyna ıe sýbektilerdiń qatary anyqtaldy. Quryltaı zań qabyldaý arqyly retteletin asa mańyzdy qoǵamdyq qatynastardyń tizbesi berildi. Zań jobalaryn qaraý men qabyldaýdyń rásimderi kózdeldi. Quryltaı Tóraǵasynyń laýazymyna qatysty máseleler jeke bapta retteldi, - dedi Konstıtýtsııalyq Sot tóraǵasynyń orynbasary. 

Eske sala keteıik, buǵan deıin Jańa Konstıtýtsııanyń sońǵy nusqasynda 95 bap bolatynyn jazǵanbyz. Bul týraly Konstıtýtsııalyq reforma jónindegi komıssııanyń 6-otyrysynda Konstıtýtsııalyq sot tóraǵasy Elvıra Ázimova aıtty.