Quryltaı jasandy ıntellekt, kóshi-qon jáne energetıka máselelerin qarastyrady
ASTANA. KAZINFORM - Quryltaı Tóraǵasy Aıbek Dádebaı Bıýro otyrysyn ótkizdi. Onda Memleket basshysynyń tapsyrmalaryn oryndaý, zań shyǵarý qyzmetindegi negizgi basymdyqtar jáne Quryltaı reglamentin daıyndaý máseleleri talqylandy, delingen Quryltaıdyń Telegram paraqshasynda.
Qoldanystaǵy zańnamany túgendep, ony jańa Konstıtýtsııaǵa sáıkestendirý Birinshi kezektegi mindetterdiń biri retinde belgilendi. Bul jumys Prezıdent Qasym-Jomart Toqaev aıqyndap bergen basymdyqtarmen, sondaı-aq ózekti áleýmettik-ekonomıkalyq jáne qoǵamdyq-saıası máselelermen birge beıindi komıtetterdiń jumys josparyna engiziledi.
Depýtattar jasandy ıntellekt pen tsıfrlyq aktıvterdi damytý, kóshi-qon saıasatyn jetildirý, erekshe qajettilikteri bar balalardy qoldaý, energetıkalyq turaqtylyqty qamtamasyz etý jáne balamaly energetıkany damytý, sondaı-aq onlaın-platformalar men buqaralyq aqparat quraldarynyń qyzmetin retteý jáne basqa da máseleler boıynsha jumys júrgizedi. Sonymen qatar aldaǵy úsh jylǵa arnalǵan respýblıkalyq bıýdjetti qaraý jumystyń jeke baǵyty bolady.
Aıbek Dádebaı parlamenttik baqylaýdyń tıimdiligin arttyrý, depýtattardyń halyqpen turaqty baılanysyn qamtamasyz etý jáne «E-Parliament» júıesin jedel engizý qajettigin atap ótti.
Bıýro otyrysynda Quryltaı Reglamentiniń jobasyn ázirleýge qatysty birqatar mindet qoıyldy. Sonymen qatar Quryltaı Tóraǵasynyń orynbasarlaryna turaqty komıtetterge jetekshilik etý mindeti bekitildi.
Aıta keteıik, osyǵan deıin Aıbek Dádebaı Quryltaı tóraǵasy bolǵany týraly jazdyq.
Quryltaıdyń alǵashqy sessııasynda jańa saıası júıeniń alǵashqy qadamy qalaı bolatyny talqylandy.
