Quryltaı tóraǵasy qazaq tilin jetik bilý kerek – Parlamenttik reforma

ASTANA. KAZINFORM – Senat depýtaty Nurlan Beknazarov Konstıtýtsııalyq reforma jónindegi komıssııanyń ekinshi otyrysynda Quryltaı tóraǵasyna qoıylatyn eń negizgi talapty atady.

- Quryltaıdy memlekettik tildi erkin meńgergen depýtattar arasynan Quryltaı depýtattarynyń jalpy sanynyń kópshilik daýsymen jasyryn daýys berý arqyly saılanǵan tóraǵa basqarady. Quryltaı tóraǵasy laýazymyna kandıdatýrany QR Prezıdenti usynady, - dedi ol.

Aıtýynsha, Konstıtýtsııada Quryltaı tóraǵasynyń qyzmetin retteıtin reglament te naqtylanady.

- Usynystarmen Quryltaıdyń birinshi sessııasyn QR Prezıdenti saılaý qorytyndysy jarııalanǵan kúnnen bastap 30 kúnnen keshiktirmeı shaqyrýy, Quryltaıdyń kezekti sessııalaryn ótkizý merzimi naqtylanǵan, - dedi Nurlan Beknazarov.

Aıta ketý kerek, bul aıtylyp otyrǵan normalardyń bári ázirge usynys qana. Normalardyń qaısysy qabyldanyp, qaısysy Ata zańǵa enbeıtinin referendým sheshedi.

Dál qazir Konstıtýtsııalyq reforma jónindegi komıssııanyń ekinshi otyrysy ótip jatyr.

Kazinform agenttiginiń qazaq jáne orys tilindegi Telegram arnasynda mátin translıatsııasy bolady.

Ótken aptada Konstıtýtsııalyq komıssııanyń alǵashqy otyrysy ótip, bir palataly «Quryltaıdyń» fýnktsııasy men quramy, vıtse-prezıdent laýazymynyń memlekettik bıliktegi orny, zań shyǵarý bastamasyn kóterýge haqyly «Halyq keńesiniń» quzyreti qandaı bolatyny aıtylǵan edi.