Quryltaı Spıkeri Jogorký Keneshtiń Tóraǵasymen kezdesti

Aıbek Dádebaı áriptesin Qyrǵyzstan Táýelsizdiginiń 35 jyldyǵymen quttyqtap, qonaqjaı peıili úshin rızashylyq bildirdi. Sondaı-aq Qyrǵyzstan Parlamentimen ekijaqty qarym-qatynasty Parlamentaralyq yntymaqtastyq jónindegi keńes, dostyq toby jáne salalyq komıtetter aıasynda barlyq deńgeıde odan ári damytý Quryltaı úshin erekshe mańyzdy ekenin atap ótti.

– Prezıdentterimiz Qasym-Jomart Kemeluly Toqaev pen Sadyr Nurǵojauly Japarovtyń saıası erik-jigeri men syndarly saıasatynyń arqasynda elderimiz arasyndaǵy qarym-qatynas qarqyndy damyp keledi. Bul Qazaqstan Respýblıkasy men Qyrǵyz Respýblıkasy arasyndaǵy odaqtastyq qatynastardy tereńdetý jáne keńeıtý týraly shartta kórinis tapty. Búgingi maqsatymyz – Prezıdentterimizdiń ýaǵdalastyqtaryn zańnamalyq turǵydan qamtamasyz etý, – dep atap ótti Quryltaı Tóraǵasy.

Aıbek Dádebaı qyrǵyz áriptesine Memleket basshysynyń bastamasymen Qazaqstanda júrgizilip jatqan aýqymdy saıası jáne konstıtýtsııalyq reformalar týraly aqparat berdi. Jańa Halyqtyq Konstıtýtsııaǵa sáıkes, bir palataly Quryltaı, Vıtse-prezıdent ınstıtýty jáne múlde jańa konsýltatıvtik organ – Qazaqstan Halyq Keńesi quryldy.

Óz kezeginde Marlen Mamatalıev Qazaqstan men Qyrǵyzstan basshylarynyń ekijaqty negizde de, kópjaqty alańdarda da ózara túsinistigi men tabysty is-qımylyn atap ótti. Jogorký Keneshtiń Tóraǵasy qazaqstandyqtardy júrgizilgen reformalarǵa qatysty quttyqtap, Quryltaı depýtattaryna jemisti jumys tiledi.

Taraptar zań shyǵarý qyzmetindegi tájirıbe almasýdy odan ári keńeıtý, túrli parlamentaralyq uıymdar men halyqaralyq birlestikter aıasyndaǵy birlesken jumysty kúsheıtý máselelerin de talqylady. Mýzyka, teatr, kıno jáne sportty qosa alǵanda, mádenı-gýmanıtarlyq saladaǵy yntymaqtastyqty damytýǵa da erekshe nazar aýdaryldy.

Aıta keteıik, «Ádilet» partııasy Quryltaı depýtatynyń bos mandatyna kandıdatýra usyndy.