Quryltaı saılaýynyń qorytyndysy qashan jarııalanady
ASTANA. KAZINFORM – Quryltaı saılaýynyń qorytyndylary saılaý ótkizilgen kúnnen bastap 10 kúnnen keshiktirilmeıtin merzimde belgilenedi. Bul týraly Ortalyq saılaý komıssııasynyń tóraǵasy Nurlan Ábdirov málim etti.
- Daýys berý kúni saılaý rásimderin baıqaýdy 51 myńnan astam ulttyq baıqaýshy júzege asyrdy. Onyń ishinde kandıdattardyń, saıası partııalardyń 7 300 senim bildirgen adamdary, saıası partııalardan 24 879 baıqaýshysy, 182 akkredıttelgen qoǵamdyq birlestikterden 26 887 baıqaýshysy, shet memleketterdiń, halyqaralyq uıymdardyń 777 baıqaýshysy qatysty. Saılaý ýchaskelerinde sheteldik jáne otandyq buqaralyq aqparat quraldarynyń ókilderi de qatysyp, saılaý barysyn jarııa etip otyrdy. Onyń ishinde qazaqstandyq buqaralyq aqparat quraldarynyń - 1 852 ókili, sheteldik buqaralyq aqparat quraldarynan - 117 akkredıttelgen jýrnalıst, - dedi komıssııa tóraǵasy.
Osy rette ol ulttyq jáne halyqaralyq baıqaýshylarǵa, qoǵamdyq birlestikter men buqaralyq aqparat quraldarynyń ókilderine saılaý protsesiniń ashyqtyǵy men jarııalylyǵyn qamtamasyz etýge járdemdeskeni úshin alǵysyn bildirdi.
- Saılaý protsesiniń barlyq kezeńinde ashyqtyq pen jarııalylyqty qamtamasyz etýge, azamattardyń saılaý quqyqtaryn tolyq júzege asyrýyna qajetti jaǵdaı jasaýǵa basa mán berildi. Saılaý týraly konstıtýtsııalyq zańnyń normalaryna sáıkes Quryltaı saılaýynyń qorytyndylary Ortalyq saılaý komıssııasynyń otyrysynda saılaý ótkizilgen kúnnen bastap 10 kúnnen keshiktirilmeıtin merzimde belgilenedi jáne buqaralyq aqparat quraldarynda jarııalanady. Otyrysty ótkizý kúni men ýaqyty qosymsha habarlanatyn bolady, - dedi ol.
Onyń aıtýynsha, aldaǵy kezeńde Ortalyq saılaý komıssııasy zańnamada belgilengen tártippen saılaýdyń qorytyndylaryn belgileý jáne saılanǵan depýtattardy tirkeý boıynsha tıisti jumystardy jalǵastyrady.
Buǵan deıin Quryltaı depýtattary saılaýynyń nátıjesin jarııalaǵan edik.
