Quryltaı saılaýynda elordalyq ýchaskeler qalaı jumys isteıdi
ASTANA. KAZINFORM – Quryltaı saılaýynda elordada 517 saılaý ýchaskesi jumys isteıdi. Onyń úsheýi jumysyn tańǵy saǵat 06-00-de bastaıdy. Bul týraly Ortalyq saılaý komıssııasynyń otyrysynda Astana aýmaqtyq saılaý komıssııasynyń tóraǵasy Beısenbaı Jumabekov aıtty.
- Astana qalasynda 517 saılaý ýchaskesi jumys isteıdi. Onyń ishinde 3 saılaý ýchaskesinde daýys berý jergilikti ýaqyt boıynsha saǵat 06-00- bastalady. Daýys berý bastalatyn ýaqyttyń ózgertilgeni týraly aýmaqtyq saılaý komıssııalarynyń sheshimi saılaýshylarǵa jetkizildi. Qala boıynsha áskerı bólimderde, statsıonarlyq emdeý uıymdarynda, qoǵamnan ýaqytsha oqshaýlaýdy qamtamasyz etetin arnaıy mekemelerde qurylǵan 35 saılaý ýchaskesinde, sonymen qatar Qazaqstannyń shet memleketterdegi ókildikteriniń janynan qurylǵan 79 saılaý ýchaskesinde eger saılaýshylar tizimine engizilgen barlyq azamat daýys berse, ýchaskelik saılaý komıssııasy daýys berýdi kez kelgen ýaqytta aıaqtaldy dep jarııalaı alady, - dedi aýmaqtyq saılaý komıssııasynyń tóraǵasy.
Onyń málimetinshe, atalǵan saılaý ýchaskeleriniń tizimi tıisti saılaý komıssııasynyń sheshimimen bekitilgen. Saılaýshylarǵa daýys berý ýaqyty men orny týraly habarlar jetkizilip jatyr.
- Shaqyrý qaǵazdarynyń 1 mln 14 817 danasy belgilengen biryńǵaı formatta daıyndaldy. Ýchaskelik komıssııalar saılaýshylarǵa shaqyrýlardy mekenjaılary boıynsha jetkizip jatyr. Munan basqa, saılaý ýchaskesiniń mekenjaıy men telefon nómiri kórsetilgen aqparattyq plakattyń 100 myń danasy kópqabatty úılerdiń kireberisterine ilindi, - dedi Beısenbaı Jumabekov.
Buǵan deıin Ortalyq saılaý komıssııasy janyndaǵy Múgedektigi bar adamdardyń saılaý quqyqtaryn qamtamasyz etý jónindegi jumys tobynyń otyrysynda saılaý quqyqtaryn tolyqqandy júzege asyrýǵa jaǵdaı jasaýǵa qatysty praktıkalyq máseleler talqylanǵan edi.
