Quryltaı saılaýynda barlyq 7 saıası partııanyń basshysy óz tańdaýyn jasady
ASTANA. KAZINFORM - Alǵashqy Quryltaı saılaýyna qatysyp jatqan 7 saıası partııanyń da tóraǵasy daýys berip boldy.
Alǵashqy bolyp «Ádilet» partııasynyń tóraǵasy Aıbek Dádebaı saılaý ýchaskesine keldi.
Ekinshi bolyp «Aýyl» partııasynyń tóraǵasy Qaırat Aıtýǵanov Imanbaev kóshesi, 4 mekenjaıynda ornalasqan № 83 saılaý ýchaskesinde óz tańdaýyn jasady.
Qaırat Aıtýǵanov búgingi kúndi el úshin tarıhı kún dep atady.
— Men azamattyq boryshymdy oryndadym, Qazaqstannyń bolashaǵy úshin daýys berdim. Búgin uly kún, Qazaqstannyń jańa baǵyt alǵan kúni. Men bul óte mańyzdy sát dep oılaımyn jáne bul kún Qazaqstannyń bolashaǵy úshin jaqsylyqtyń bastaýy dep sanaımyn, — dedi.
Al Qazaqstan Halyq partııasynyń (QHP) tóraǵasy Nursultan Shoqanov Ulttyq akademııalyq kitaphana ǵımaratynda ornalasqan Quryltaı saılaý ýchaskesinde daýys berdi.
– Búgin bizde shyn máninde merekelik kóńil kúı. Óte mańyzdy kún. Onyń mańyzyn asyra baǵalaý qıyn. Menińshe, búgingi kúnniń nátıjesine qaramastan, odan barlyq qazaqstandyqtar men elimiz utady, – dedi Nursultan Shoqanov.
«Baıtaq» partııasynyń tóraǵasy Azamathan Ámirtaev Quryltaı saılaýynda daýys bere otyryp, búgingi kúnniń el tarıhyndaǵy mańyzyna toqtalyp ótti.
— Búgin tarıhı kún. El tarıhynda alǵash ret Quryltaıdy saılap jatyrmyz. Bul - Prezıdent bastaǵan saıası reformalardyń naqty qadamy. Men bul jerge saılaýshy retinde keldim. Meniń daýysym osy kezekte turǵan kez kelgen adamnyń daýysymen teń. Búgingi kúnniń máni de osynda, — dedi Azamathan Ámirtaev.
Sondaı-aq JSDP tóraǵasy Ashat Raqymjanov № 332 Quryltaı saılaý ýchaskesinde daýys berdi.
— Búgin kópten kútken kún kelip jetti. Bul kún týraly kóp aıtyldy, bárimiz kúttik. Búgin jańa ókildi organ — Quryltaı qurylady. Osy oraıda barsha qazaqstandyqty quttyqtaǵym keledi. Bul kún tarıhta qalady. Birneshe saǵattan keıin búgingi kúnniń ózi tarıhqa aınalady, — dedi Ashat Raqymjanov.
Odan bólek Respublica partııasynyń tóraǵasy Aıdarbek Qojanazarov Astanadaǵy №101 mektep-lıtseıinde ornalasqan №256 saılaý ýchaskesinde daýys berdi.
Tańdaýyn jasaǵan soń, ol saılaýdyń mańyzyna toqtalyp, bul kúndi Qazaqstannyń jańa kezeńge qadam basýymen baılanystyrdy.
– Táýelsizdik shejiresindegi alǵashqy Quryltaı saılaýynyń tarıhı máni zor, jóni bólek. El bolashaǵyn aıqyndaıtyn mańyzdy kezeńniń bastaýynda turmyz. Prezıdentimizben, halqymyzben birge jańa tarıhty jazyp jatyrmyz. Qazaqstan jańa dáýirge qadam basyp otyr. Qýatty, progressıvti, ádiletti Qazaqstan dáýiri bastalsyn! Elimizdiń qadamy qutty bolsyn! – dedi Aıdarbek Qojanazarov.
«Aq jol» demokratııalyq partııasynyń tóraǵasy Danııa Espaeva Quryltaı saılaýynda daýys berip, búgingi kúndi el tarıhyndaǵy mańyzdy kezeń dep atady.
— Búgin qazaq eli úshin úlken mereke dep oılaımyn. Tarıhymyzda alǵash ret Quryltaıǵa saılaý ótip jatyr. Halqymyz óziniń belsendiligin kórsetip, saılaýǵa kelip, óz tańdaýyn jasaıdy dep oılaımyn, — dedi Danııa Espaeva.
Búgin elimizdiń barlyq óńirinde Quryltaı depýtattaryn saılaý bastaldy. Daýys berý 10 423 saılaý ýchaskesinde ótedi. Eske salsaq, bıyl 1 shildede Memleket basshysy «Qazaqstan Respýblıkasy Quryltaıynyń saılaýyn taǵaıyndaý týraly» Jarlyqqa qol qoıdy.
QR Ortalyq saılaý komıssııasy Quryltaı saılaýyna qatysatyn «Ádilet», JSDP, «Baıtaq», QHP, «Aýyl» partııasy, «Aq jol» jáne Respublica partııasynyń tizimderin tirkedi. 145 depýtattyq mandatqa 545 kandıdat úmitker bolyp otyr.
