Quryltaı saılaýynda alǵash bolyp Seýldegi qazaqstandyq stýdent daýys berdi
ASTANA. KAZINFORM — Qazaqstan Respýblıkasynyń azamattary Quryltaı depýtattaryn saılaýyna birinshi bolyp Koreıada júzege asyrdy, dep habarlaıdy SІM baspasóz qyzmeti.
Seýldegi saılaý ýchaskesinde alǵashqylardyń biri bolyp Koreıa ýnıversıtetiniń stýdenti Ajar Kárimjanova óz tańdaýyn jasady.
— Men Koreıada úsh jyldan beri turyp, qazirgi ýaqytta Koreıa ýnıversıtetinde bilim alyp júrmin. Qazaqstan Respýblıkasynyń azamaty retinde elimizdiń bolashaǵyna qatysty mańyzdy qoǵamdyq-saıası úderisterden tys qalmaýǵa jáne óz úlesimdi qosýǵa tyrysamyn, — dedi Ajar Kárimjanova.
Onyń aıtýynsha, saılaýǵa qatysý — ár azamattyń konstıtýtsııalyq quqyǵy ǵana emes, sonymen qatar azamattyq jaýapkershiligi men paryzy.
— Bizdiń tańdaýymyz elimizdiń bolashaǵyna tikeleı áser etedi. Búgin qabyldanatyn sheshimder erteńgi Qazaqstannyń damý baǵytyn aıqyndaıdy. Sondyqtan jastardyń óz pikirin bildirip, eldiń qoǵamdyq-saıası ómirine belsendi qatysýy óte mańyzdy, — dep atap ótti ol.
Aıta keteıik, Búgin 03:00–de Seýl (Ońtústik Koreıa) men Tokıoda (Japonııa) saılaý ýchaskeleri ashyldy.
Eske salsaq, bıyl 1 shildede Memleket basshysy «Qazaqstan Respýblıkasy Quryltaıynyń saılaýyn taǵaıyndaý týraly» Jarlyqqa qol qoıdy.
QR Ortalyq saılaý komıssııasy Quryltaı saılaýyna qatysatyn 7 saıası partııanyń tizimderin tirkedi. 145 depýtattyq mandatqa 545 kandıdat úmitker bolyp otyr.
