Quryltaı saılaýynda 4 mıllıonǵa jýyq jas daýys berdi
ASTANA. KAZINFORM — Quryltaı saılaýynda 4 mıllıonǵa jýyq jas daýys berdi. Saılaý aldynda júrgizilgen áleýmettaný saýalnamalarynda qazaqstandyq jastardyń 60%-dan astamy daýys berýge daıyn ekenin aıtqan. Bul týraly Jastar X dıalog alańynda QR Mádenıet jáne aqparat mınıstrligi «Taldaý jáne aqparat ortalyǵy» RMK dırektory Mıhaıl Komıssarov málim etti.
Onyń aıtýynsha, bıylǵy saılaý naýqany jastardyń belsendi qatysýymen erekshelendi.
Sarapshynyń sózinshe, jastardyń saılaýǵa qatysýǵa daıyndyǵy daýys berý nátıjesinen de baıqaldy.
— Naqty daýys bergenderge kelsek, olardyń 4 mıllıonǵa jýyǵy — jastar, — dedi ol.
Mıhaıl Komıssarov daýys berý nátıjesi qazaqstandyq jastardyń qoǵamdyq-saıası úderisterge belsendi aralasyp, el bolashaǵyna yqpal etýge umtylatynyn kórsetetinin atap ótti.
— Qazirgi jastar áleýmettik jaýapkershiligi joǵary, azamattyq sanasy qalyptasqan. Sondyqtan jas urpaqtyń saıası úderiske qatysyp, el bolashaǵyna qandaı da bir deńgeıde yqpal etýge, memleketimizdiń damý baǵyttaryn aıqyndaýǵa umtylýy zańdy, — dedi sarapshy.
Onyń aıtýynsha, saılaýǵa alǵash ret daýys bergen 18 jastaǵy azamattarmen qatar, 25 pen 35 jas aralyǵyndaǵy jastar da qatysty.
Eske salaıyq, Quryltaı saılaýy 23 tamyzda ótti.
Ortalyq saılaý komıssııasynyń dereginshe, saılaýda 9 351 539 adam daýys berdi. Bul - saılaýshylardyń jalpy sanynyń 74,08%-y.
Saılaý qorytyndysy boıynsha Quryltaıǵa bes saıası partııa ótti.
