Quryltaı saılaýyna eýropalyq baıqaýshylar qandaı baǵa berdi
ASTANA. KAZINFORM — Quryltaı saılaýy Eýropalyq jýrnalıster men sarapshylardyń nazaryn aýdardy. Saılaý barysyn baqylaǵan Germanııa men Aýstrııa ókilderi Kazinform tilshisine bergen suhbatynda Qazaqstandaǵy saıası reformalarǵa toqtalyp, Eýropamen yntymaqtastyqty odan ári damytý múmkindikteri týraly pikir bildirdi.
Germanııadaǵy Berliner Zeitung basylymynyń geosaıasat bóliminiń jetekshisi Nıkolas Býtylınniń aıtýynsha, Quryltaı saılaýy Qazaqstandaǵy júıeli reformalardy júzege asyrýda mańyzdy qadam boldy.
— Men el azamattarynyń saıası ómirge baıyppen ári zor qyzyǵýshylyqpen aralasyp jatqanyn kórdim. Qazaqstanda júzege asyp jatqan reformalardyń qarqyny shynymen de tańǵaldyrady. Al alǵashqy Quryltaı saılaýyn osy ózgeristerdiń zańdy jalǵasy ári mańyzdy kezeńi dep baǵalaýǵa bolady, — dedi Nıkolas Býtylın.
Sarapshy Qazaqstannyń álemdik geosaıası jáne ekonomıkalyq keńistiktegi róliniń artyp kele jatqanyn da atap ótti.
— Sońǵy jyldary, ásirese keıingi aılarda Qazaqstan Germanııa men Eýropalyq odaqtyń nazaryn aıryqsha aýdaryp otyr. Astanada álemniń túkpir-túkpirinen kelgen jýrnalıster men sarapshylardy kezdestirýge bolady. Qazaqstan búginde jahandyq múddeler toǵysatyn, túrli taraptar ózara pikir almasyp, dıalog qura alatyn biregeı alańǵa aınalyp keledi, — dedi ol.
Býtylın óńirdiń ekonomıkalyq áleýeti Qazaqstan men Germanııa arasyndaǵy yntymaqtastyqty odan ári keńeıtýge zor múmkindik beretinin atap ótti. Onyń aıtýynsha, Transkaspıı halyqaralyq kólik baǵytyn (Orta dáliz) damytý jáne nemis kompanııalarynyń ınvestıtsııasyn tartý ekijaqty baılanystarǵa tyń serpin bere alady.
— Qazaqstandaǵy saılaý biz úshin aıryqsha qyzyqty. Jalpy, Germanııa men Qazaqstan arasyndaǵy baılanys joǵary deńgeıde. Sońǵy jyldary eki eldiń yntymaqtastyǵy aıtarlyqtaı jandanyp, ózara qarym-qatynas jańa serpin aldy. Bul áriptestik júıeli túrde damyp keledi jáne bolashaǵy zor, — dedi basylymnyń saıası sholýshysy.
Quryltaı saılaýyna Aýstrııanyń Bostandyq partııasynyń (FPÖ) múshesi, Aýstrııa Federaldyq keńesiniń (Býndesrat) depýtaty Andreas Artýr Shpanrıng te keldi.
— Men Qazaqstanǵa EQYU-nyń saılaýdy baqylaý jónindegi mıssııasynyń quramynda keldim. Biz saılaý barysyn jiti baqylaýda ustadyq, biraq úderisterge aralaspadyq. Tek bolǵan jaǵdaılardy tirkep, tıisti aqparatty mıssııa múshelerine jetkizip otyrdyq, — dedi saıasatker.
Ol Qazaqstan men Aýstrııa arasyndaǵy ekonomıkalyq yntymaqtastyqty damytýǵa mol múmkindik bar ekenin aıtty. Onyń aıtýynsha, buǵan aýstrııalyq bıznestiń Qazaqstan naryǵyna qyzyǵýshylyq tanytyp, belsendi áreket etýi de yqpal etip otyr. Eki el arasyndaǵy baılanysty odan ári nyǵaıtý Qazaqstanǵa da, Aýstrııaǵa da tıimdi bolmaq.
Sondaı-aq sheteldik depýtat elordanyń zamanaýı kelbeti men qarqyndy damýyna erekshe tánti bolǵanyn aıtty.
— Sońǵy jyldary Ortalyq Azııaǵa birneshe ret kelýdiń sáti tústi, óńirdiń órkendep, ekonomıkasy damyp kele jatqany aıqyn kórinedi. Árıne, aýqymdy ózgerister bir kúnde júzege aspaıdy. Ásirese saıasatta qalyptasqan júıeni bir sátte ózgertý múmkin emes, oǵan ýaqyt qajet. Degenmen Qazaqstandaǵy reformalardyń durys baǵytta júrip jatqany anyq baıqalady. Qazaqstanǵa árdaıym sáttilik tileımin jáne aldaǵy ýaqytta eki el arasyndaǵy yntymaqtastyqtyń odan ári nyǵaıa túsetinine senemin, — dedi Andreas Artýr Shpanrıng.
Buǵan deıin halyqaralyq baıqaýshy Quryltaı saılaýyna qatysý belsendiliginiń joǵary bolǵanyn jáne saılaý úderisiniń tıisti deńgeıde uıymdastyrylǵanyn atap ótken edi.
Aqzat Jıenalına
