Quryltaı saılaýyna daýys berýshi ular qusynyń beınesinde keldi
JEZQAZǴAN. KAZINFORM - Ulytaý oblysy, Ulytaý aýdanyndaǵy №123 saılaý ýchaskesinde kelýshilerdi erekshe keıipker – Ulytaýdyń tabıǵı bolmysyn beıneleıtin «Ular» qusy qarsy aldy.
Erekshe format saılaý kúnine ózindik sıpat berip, ýchaskege kelgen turǵyndarǵa kóterińki kóńil kúı syılady. «Ular» beınesindegi anımator azamattardy jyly qarsy alyp, kelýshilermen estelik sýretterge tústi.
Ular beınesiniń tańdalýynyń ózindik máni bar. Ular – Ulytaýdyń tabıǵı ereksheligi men rýhanı bolmysyn sabaqtastyratyn sımvol. Bıik taýlardy mekendeıtin bul qus asqaqtyqty, erkindikti, tózimdilik pen ómirsheńdikti beıneleıdi. Al Ulytaý – qazaq tarıhyndaǵy eldik pen birliktiń, ulttyq rýh pen memlekettiliktiń mańyzdy nyshandarynyń biri.
Osy turǵydan alǵanda, №123 saılaý ýchaskesindegi «Ular» beınesi jaı ǵana erekshe obraz emes, Ulytaýdyń tabıǵaty men tarıhyn zamanaýı formatta tanytatyn sımvoldyq sheshim boldy. Ulardyń bıikke umtylǵan bolmysy óńirdiń bolashaqqa degen senimimen, al onyń týǵan tabıǵatymen etene baılanysy Ulytaýǵa degen súıispenshilikpen úndesedi.
Ular – tabıǵatta sırek kezdesetin, taýly aımaqtardy mekendeıtin erekshe qustardyń biri. Onyń tabıǵı ortaǵa beıimdiligi, bıik taýlardy meken etýi Ulytaýdyń tabıǵı landshaftymen tyǵyz sabaqtas. Sırek kezdesetin qustardyń qataryndaǵy ulardy qorǵaý – óńirdiń bıoalýandyǵyn saqtaýdaǵy mańyzdy baǵyttarynyń biri. Sondyqtan «Ular» beınesin tańdaý arqyly Ulytaýdyń tabıǵı baılyǵyn dáripteý ǵana emes, tabıǵatty aıalaý men qorshaǵan ortaǵa jaýapkershilikpen qaraý qundylyǵy da nasıhattaldy.
