Quryltaı saılaýyn ótkizýge qarjy qaıdan bólinedi — OSK jaýap berdi
ASTANA. KAZINFORM — QR Ortalyq saılaý komıssııasynyń múshesi Mıhaıl Bortnık Quryltaı depýtattarynyń saılaýyn ótkizýge bólinetin qarjy kólemi keıinirek naqtylanatynyn aıtty.
— Quryltaı depýtattarynyń saılaýyn qarjylandyrý respýblıkalyq bıýdjet qarajaty esebinen jergilikti atqarýshy organdardyń shottary arqyly júzege asyrylady. Bul zańda kórsetilgen. Alaıda 2026 jyldyń bıýdjetinde saılaý ótkizý shyǵyndary qarastyrylmaǵandyqtan, qarajat Úkimet rezervinen bólinedi, — dedi Mıhaıl Bortnık OSK otyrysynda.
Onyń aıtýynsha, qazirgi ýaqytta shyǵystar smetasy ázirlenip jatyr, sondyqtan naqty somany ataýǵa áli erte.
— Jalpy smetanyń shamamen 75 paıyzy 71 myń saılaý komıssııasy múshesiniń eńbekaqysyn tóleýge jumsalady. Bul kórsetkish ótken referendým kezindegi shyǵyndarmen shamalas, — dedi OSK múshesi.
Sondaı-aq saılaý bıýlletenderin, aqparattyq plakattardy jáne saılaý ýchaskelerinde ornalastyrylatyn partııalar týraly materıaldardy basyp shyǵarýǵa qarjy qarastyrylǵany aıtyldy.
Budan bólek, saılaý naýqanyn aqparattyq súıemeldeýge arnalǵan beınerolıkter men BAQ-taǵy aktsııalarǵa, saılaý komıssııalaryn materıaldyq-tehnıkalyq qamtamasyz etýge, issapar, kólik jáne baılanys qyzmetterine de qarajat bólinedi.
— Bul baǵyttarǵa saılaý naýqany bıýdjetiniń shamamen 25 paıyzy jumsalady. Naqty qarjy kólemi týraly keıinirek aıta alamyz, — dedi Mıhaıl Bortnık.
Aıta keteıik, Nurlan Ábdirov Quryltaı saılaýyna belsendi qatysýǵa shaqyrdy.
